Учта астероид 28 май куни Ер олдидан учиб ўтади, улар потенциал хавфли астероидлар ҳисобланади. Бу ҳақда АҚШ космик агентлиги (НАСА) хабар берди.
Мазкур астероидлар сайёра учун тўғридан-тўғри хавф туғдирмайди. Улар 2025 KW (диаметри 29,7 метр, самолёт катталигидай), 2025 JR (79,5 метр, бино катталигидай) ва 2025 KU1 (20,2 метр) номли астероидлар саналади.
Яна иккита астероид — 2025 KT1 ва 2025 JP Ер атрофидан 26 ва 27 май кунлари учиб ўтган. Биринчисининг диаметри 12,8 метр, иккинчисиники эса 25,3 метр (самолёт катталигидай).
НАСА таснифига кўра, Ерга 7,4 миллион километр масофага яқинлашадиган астероидлар “потенциал хавфли” ҳисобланади. Ушбу объектларнинг барчаси жуда катта тезликда учишига қарамай, улар Ерга ҳеч қандай хавф туғдирмайди. Ҳар йили НАСА телескоплари Ерга яқинлашаётган 3000 дан ортиқ янги астероидларни қайд этади. Уларнинг анчагина қисми атмосферада ёниб кетади.
2025 йил январь ойида 2024 YR4 астероиди сайёрамиз учун потенциал хавфли осмон жисмлари рўйхатида биринчи ўринни эгаллаган. Ўшанда унинг Ер билан тўқнашиш эҳтимоли 1,3 фоизни ташкил этганди. Космик жисмнинг диаметри эса 100 метр деб баҳоланган. Ушбу астероиднинг Ер билан эҳтимолий тўқнашуви глобал ҳалокатга олиб келмаслиги прогноз қилинганди.
Изоҳ (0)