Америка Қўшма Штатлари ҳукумати ўз фуқароларини Венесуэла ва унинг атрофига саёҳат қилмасликка чақирди. Бу ҳақда Fox News хабар берди.
Венесуэла ҳозирда саёҳат учун хавфлилик даражаси бўйича АҚШда 4-ўринда турибди. Қўшма Штатлар давлат департаменти хабарига кўра, фуқаролар бир қатор жиддий хавфлар туфайли Венесуэлага саёҳат қилмаслик ҳақида огоҳлантирилган.
Ушбу хавфларга ноқонуний ҳибсга олиш, ҳибсдаги қийноқлар, терроризм, одам ўғирлаш, маҳаллий қонунларни ўзбошимчалик билан ижро этиш, жиноятчилик, тартибсизликлар ва ёмон соғлиқни сақлаш инфратузилмаси кабилар киради.
Айни пайтда Венесуэла АҚШ фуқароларининг ноқонуний ҳибсга олиниши бўйича дунёдаги етакчи давлатга айланган.
2019 йил март ойида давлат департаменти АҚШнинг Каракасдаги элчихонасидан барча дипломатик ходимларни чақириб олган ва фаолиятини тўхтатган. Бу Венесуэлада АҚШ консуллиги мавжуд эмаслигини ва АҚШ ҳукумати Венесуэладаги фуқароларига одатий ёки фавқулодда консуллик хизматларини кўрсата олмаслигини англатади.
“Венесуэла полиция ва хавфсизлик кучлари демократияни қўллаб-қувватловчи ёки тузумга қарши намойиш иштирокчиларига қарши кўздан ёш оқизувчи газ, қалампир спрейи ва резина ўқлардан фойдаланган. Бу ҳол баъзан талончилик ва вандализмга айланиб кетмоқда”, деб ёзган Fox News.
“Саёҳатчилар Венесуэлада тиббий ёрдам, айниқса, рецептсиз бериладиган дорилар чекланишини ҳисобга олишлари лозим. Мамлакатнинг Колумбия, Бразилия ва Гайана билан чегарадош ҳудудларидан қочинг. Бу ҳудудларда Колумбия террористик гуруҳлари фаолият юритади. Агар Венесуэлага саёҳат қилишни танласангиз, АҚШ сизга йўқолган, ўғирланган ёки муддати тугаган саёҳат ҳужжатларини тиклашда ёрдам бера олмайди. Ҳозирда Венесуэлада бўлган ҳар қандай АҚШ фуқароси зудлик билан жўнаб кетиши тавсия этилади”, деб мурожаат қилган АҚШ давлат департаменти.
Изоҳ (0)