АҚШ президенти Дональд Трамп Россия президенти Владимир Путин билан учрашмагунча Украина бўйича тинчлик музокараларида силжиш кутилмаслигини маълум қилди. Бу ҳақда Reuters хабар берди.
“Путин билан учрашмаганимизча ҳеч қандай ўзгариш бўлмайди”, деди Трамп Абу Дабига қўнишдан олдин Аир Форcе Оне самолётида журналистларга.
Sky News’нинг қайд этишича, АҚШ президенти бу фикрни ўз самолётида спагетти ва гўштли шарчалардан иборат таомни истеъмол қилганидан сўнг билдирган.
Бундан аввал у Истанбулда бўлиб ўтадиган музокараларга россиялик ҳамкасби Владимир Путин келмагани сабабини айтганди.
“Агар мен бормасам, нега у келиши керак? Чунки мен бормоқчи эмасдим. Мен борардим, лекин боришни режалаштирмадим”, деди у.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
АҚШ президенти Дональд Трамп Россия ва Украина вакиллари ўртасида учрашувлар бўлиб ўтиши мумкин бўлган Истанбулга ташриф буюриш имкониятини кўриб чиқаётганини маълум қилди.
АҚШнинг Украинадаги махсус вакили Кит Келлог агар Россия президенти Владимир Путин 15 май куни Туркияга Россия ва Украина ўртасидаги учрашувга келса АҚШ президенти Дональд Трамп ҳам Истанбулга бориши мумкинлигини билдирди.
Изоҳ (0)