АҚШ томонидан қўллаб-қувватланадиган Ғазо гуманитар жамғармаси (ҒГЖ) Ғазо секторига ёрдам тарқатишни бошлаганини маълум қилди. Бу ҳақда Fox News хабар берди.
ҒГЖ озиқ-овқат миқдори ҳақида маълумот бермаган, аммо таъминот ўз марказларига етиб борганини ва бутун минтақа бўйлаб тақсимланаётганини айтган. Ташкилот, шунингдек, 28 май куни яна овқат тўла юк машиналари келишини таъкидлаган.
“Ғазо секторига инсонпарварлик ёрдами киришини осонлаштириш бўйича олиб борилаётган саъй-ҳаракатлар доирасида сўнгги ҳафталарда Қўшма Штатлар билан яқин мувофиқлаштирилган ҳолда тўртта ёрдам тарқатиш маркази ташкил этилди,” дейилади Исроил Мудофаа кучлари баёнотида.
Ташкилот ишга тушишидан олдин катта тўсиққа дуч келган: ёрдам тарқатилиши бошланишидан бир неча соат олдин ташкилот раҳбари ишдан бўшаган. ҒГЖ ижрочи директори бўлган Жейк Вудс 26 май куни ташкилот инсонийлик, бетарафлик, холислик ва мустақилликнинг инсонпарварлик тамойилларига риоя қила олмаслигини таъкидлаб лавозимидан воз кечган.
“Мен Исроилни Ғазога ёрдам кўрсатишга чақираман. Барча манфаатдор томонларни эса кечиктирмасдан, чалғитмасдан ёки камситмасдан ёрдам кўрсатишнинг инновацион янги усулларини излашни давом эттиришга чорлайман. ҲАМАСнинг барча гаровга олинганларни озод қилишига, ҳарбий ҳаракатларни тўхтатишга ва минтақада тинчлик ўрнатилишига ишонаман”, деган Вудс.
Жамғарма ёрдамида ташкил этилаётган тўртта ёрдам марказнинг барчаси Исроил ҳарбий позицияларига яқин экани ҳамда учтаси фаластинликлар кам бўлган узоқ жанубда жойлашгани ҳисобига танқидларга учраган. Бирлашган Миллатлар Ташкилоти ва ёрдам гуруҳлари ҳам бу ташкилотни танқид қилмоқда.
БМТнинг Гуманитар масалаларни мувофиқлаштириш бошқармаси вакили ҒГЖни “зарур нарсадан чалғишдир”, деб фикр билдирган.
Изоҳ (0)