“ Ҳозир ўқиш ва карьера қилиш учун зўр пайт — IELTS’дан 9 олган Гуласал Бутаеванинг ҳикояси

Яқин ўтмишда хорижда ўқиган ўзбекистонлик ёшлар бармоқ билан санарли бўлган бўлса, бугун улар жамиятнинг энг фаол, мақсадли ва ташаббускор қатламига айланиб улгурди.

Улар халқаро дастурлар орқали нафақат билим олишяпти, балки ўз юрти учун илҳом манбаига ҳам айланмоқда. Бугунги ҳикоямиз Америкада мактаб, Ўзбекистонда университет, халқаро лойиҳалар, семинарлар ва таълимга бағишланган Гуласал Бутаева ҳаёти ҳақида.

“Мен катта ҳаётга қадам қўйишим қанақадир зўр пайтга тўғри келди”, дейди ўқув маркази ўқитувчиси Гуласал Бутаева.

Қашқадарёлик қиз ҳаётидаги илк бурилиш айнан 9-синфда содир бўлади. Ўзбекистонда узоқ йиллар ёпиқ бўлган FLEX дастури айнан ўша йил қайта йўлга қўйилади. Бу дастурнинг илк иштирокчиларидан бири сифатида Гуласал АҚШнинг Нью Йорк штатидаги Irondequoit High School’да бир йил давомида ўқийди.

“Америкада мустақил яшаш, инглиз тилида фикрлаш, танимаган одамлар билан тезда алоқа ўрнатиш — ҳаётимни ўзгартирди. Ўзимга бўлган ишонч айнан ўша даврда шаклланди”, дея эслайди у.

Ўз фаолияти давомида Гуласал ТеchGirls дастурига ҳам танлаб олинади. АҚШ Давлат департаменти томонидан ўтказиладиган мазкур нуфузли дастур доирасида у 12 мамлакатдан келган тенгдошлари билан технологиялар, лидерлик ва маданиятлараро мулоқот бўйича чуқур билим олади. Орадан кўп ўтмай, у ТеchGirls alumnae кенгашида офицер, кейин эса катта маслаҳатчи сифатида фаолият юритади.

2022 йил Қаршида ижтимоий ҳимояга муҳтож ўқувчилар учун BraveCoders номли дастурлаш бўйича боотcамп ташкил этилади. Бу лойиҳа орқали Гуласал уч ҳафта давомида ўқувчиларга фронтенд ва баcкенд асосларини ўргатади, компанияларга ташрифлар, меҳмонлар билан учрашувлар уюштиради. Қаҳрамонимизнинг ушбу лойиҳаси АҚШдаги Legacy International халқаро ташкилоти томонидан Outstanding Project Award билан тақдирланади.

У фаолияти давомида Вашингтонда бўлиб ўтган Давлат департаментининг катта брифингида 250 дан ортиқ дипломат ва талабалар олдида нутқ сўзлаш шарафига муяссар бўлган. CyberStart America дастурлаш марафонларидан тортиб, WSIS Forum’даги Python тренингларгача, Edukhan онлайн мактабидаги фаолиятидан American Corner Qarshi’даги волонтёрлик ишлари — буларнинг барчаси Гуласал ҳаётидаги ажралмас босқичлар бўлиб, қаҳрамонимиз ҳар бир босқичда янги тажриба орттирди ва бугунгидек ўз соҳасининг энг олди мутахассиси бўлиб шаклланди.

Тошкентдаги Халқаро Вестминстер университетида Business Information Systems йўналишида 2-босқичда таҳсил олаётган Гуласал айни пайтда ўқув марказида ҳам инглиз тили ўқитувчиси сифатида фаолият юритмоқда. IELTS имтиҳони топширадиганлар ичида максимал балл олганлар “niner” (тўққизчи) дейилади. Гуласал ишхонасида шундай натижа қайд этган тўққиз нафар мутахассисдан бири сифатида катта ҳурматга эга.

Маълумот учун: ҳозирда Ўзбекистонда атиги 3 нафар аёл “niner” бўлиб, улардан энг ёши Гуласалдир. Бугун Гуласал ўзини нафақат инглиз тили ўқитувчиси, балки технологиялар орқали аёллар ҳаётига ижобий таъсир кўрсата оладиган ёш лидер сифатида кўради. Унинг ҳикояси — кучли ирода, режалаштирилган ҳаракат ва имкониятдан тўғри фойдаланиш намунаси.

“Мен режалаштиришни яхши кўраман. Энг оддий кун ҳам қандайдир фойдали натижа билан тугаши керак. Аёллар тил билиши керак, улар ҳам технологияда яшай олиши керак — бу мени ишончим, орзум ва мақсадим. Бу йўлда президентимизнинг раҳбар аёлларга кўрсатаётган эътибори менга илҳом бўляпти. Мен ҳам келажакда ўз компаниямни барпо этиб, мамлакатимизнинг киберхавфсизлиги йўлида хизмат қилишни, кибер фронтда туриб, юртимиз ва фуқароларимизни рақамли таҳдидлардан ҳимоя қилишни истайман”, дейди қаҳрамонимиз.

Бу ҳикоя фақат ютуқ ва муваффақиятлар ҳақида эмас, балки машаққатли меҳнат, қатъият, тўғри қарорлар ва энг муҳими, имкониятлардан фойдаланишни билиш ҳақида. Гуласал ҳали жуда ёш. Аммо босиб ўтган йўли, ўзлаштирган тажрибаси ва юрагидаги катта орзулар уни келажакдаги ижтимоий ўзгаришлар, илм-фан ва таълим соҳасидаги илғор ташаббусларнинг етакчисига айлантирмоқда.

У фақат ўз йўлини топгани йўқ — у орқасидан келаётганлар учун ҳам йўл очмоқда. Унинг ҳар бир қадами нафақат ўзи учун, балки келажак авлод учун ҳам замин бўлиб хизмат қилишига ишонч билдирамиз.