Ғазо секторидаги барча шифохоналарнинг камида 94 фоизи шикастланган ёки вайрон этилган, Фаластин анклави шимолида яшовчилар деярли ҳар қандай тиббий ёрдам олиш имкониятидан маҳрум бўлган. Бу ҳақда Жаҳон соғлиқни сақлаш ташкилоти (ЖССТ) ҳисоботида келтирилди.
“Ғазо секторидаги 36 та шифохонадан атиги 19 таси дори-дармонларнинг жиддий танқислиги, тиббиёт ходимларининг етишмаслиги ва хавфсизлик билан боғлиқ муаммоларга қарамай фаолиятини давом эттирмоқда ва улардан фақат 12 таси турли хил тиббий хизматларни кўрсата олади, қолганлари эса фақат асосий ва шошилинч ёрдам бера олади. Ғазо секторидаги барча шифохоналарнинг камида 94 фоизи шикастланган ёки вайрон этилган”, дейилади ҳужжатда.
Ма`лум қилинишича, анклав ҳудудида жанговар ҳаракатлар 2025 йил 18 мартда қайта бошланганидан бери ЖССТ тиббий муассасаларга 28 та ҳужумни қайд этган, 2023 йил октябрь ойидан бери эса бундай ҳужумлар сони камида 697 тага етган.
“Анклав шимолида яшовчилар деярли барча тиббий ёрдамдан маҳрум бўлган. Жанубдаги касалхоналар ярадорлар билан тўлиб кетган. Ҳозирда Ғазо секторида 2 миллиондан ортиқ аҳоли учун атиги 2 мингта касалхона ўрни мавжуд”, дея таъкидлади ЖССТ.
Шунингдек, ташкилот “давом этаётган жанговар ҳаракатлар ва ҳарбийларнинг мавжудлиги шифокорларга тиббий ёрдам кўрсатишга ва захираларни касалхоналарга етказиб беришга тўсқинлик қилаётгани”ни қўшимча қилган.
Ташкилот минтақада зудлик билан ва доимий равишда ўт очишни тўхтатишга чақириб, “БМТ ва унинг ҳамкорлари Ғазо сектори ҳудудига ёрдам етказиш бўйича аниқ, тамойилли ва самарали режага эга” эканини эслатган.
Буюк Британия Ташқи ишлар вазирлиги раҳбари Девид Лемми Исроил армиясининг Ғазо секторидаги янги операцияси сабабли Исроил билан эркин савдо битимини тузиш бўйича музокараларни тўхтатганини маълум қилди.
Бундан олдин Нетаньяху Исроил Ғазо секторининг бутун ҳудудини назорат қилишини ва Фаластиннинг ҲАМАС ҳаракатига “гуманитар ёрдамни талон-тарож қилишига” йўл қўймаслигини айтган эди.
18 май куни Исроил мудофаа кучлари (СAHAЛ) “Гидеон аравалари” операцияси доирасида Ғазо секторида кенг кўламли қуруқликдаги ҳаракатларни бошлади. СAHAЛ хабарида айтилишича, бу ҳаракатлар “Ғазода жойлашган террорчи ташкилотларга” қарши қаратилган.
Изоҳ (0)