Ўта оғир касалликлар билан оғриган 85 нафар фаластинлик 30 июль куни даволаниш учун Ғазодан БААга жўнатилди. Бу ҳақда Жаҳон соғлиқни сақлаш ташкилоти тарқатган хабарга асосланиб, Al Arabiya нашри хабар берди.
Манбада айтилишича, беморлар ўта оғир даражадаги, ҳаёт учун хавфли жароҳатларга эга. Ғазо ҳудудида уларга ёрдам кўрсатишнинг ҳеч қандай имкони йўқ. Беморлар Бирлашган Араб Амирликларига боргач, у ерда мураккаб жарроҳлик амалиётини бошдан кечириши хабар қилинган.
Жаҳон соғлиқни сақлаш ташкилоти маълумотларига кўра, беморларнинг 35 нафари болалар ва 50 нафари ёши катталардан иборат. Беморлар билан бирга уларнинг 63 нафар қариндошлари ҳам БААга жўнаб кетган.
Беморлар дастлаб Ғазодан Керем Шалом ўтказув пункти орқали Исроилга кирган. Сўнгра улар Исроил жанубидаги Эйлат шаҳрига, Рамон аэропортига кўчирилган. Ушбу аэропортдан Абу-Дабига жўнаб кетилган.
“53 нафар бемор саратон касаллигига чалинган, улардан тўрт нафари бола. Яна 20 нафарида оғир даражадаги тана шикастланишлари бор. Уч нафар фаластинлик қон касалликлари билан оғриган, жумладан талассемия ва шу каби хасталиклар. Учта беморда туғма касалликлар аниқланган. Шунингдек, икки беморда фанкони анемияси, бир кишида неврологик касаллик, яна уч кишида юрак, буйрак ва жигар хасталиклари қайд этилган”, дейилган ЖССТ ҳисоботида.
Маълумотларга кўра, жорий йилнинг октябрь ойидан бери Ғазодан ташқарида даволаниш учун 5000 га яқин фаластинлик эвакуация қилинган. Уларнинг 80 фоиздан ортиғи Миср, Қатар ва БААда жўнатилган.
Ғазо Соғлиқни сақлаш вазирлиги анклав ҳудудида тиббий эвакуацияга муҳтож 10 000 нафар фуқаро борлигини айтган. Қўшни араб мамлакатларини ёрдам дастурини кучайтиришга тиббий муассасаларни тиклашда ёрдам беришга чақирган.
Изоҳ (0)