Туркия Суриянинг марказий қисмида ҳарбий базага эга бўлишни хоҳлайди. Бу ҳақда АҚШ давлат котиби, президентнинг миллий хавфсизлик бўйича ёрдамчиси вазифасини вақтинча бажарувчи Марко Рубио маълум қилди.
У АҚШ Сенатининг ташқи ишлар қўмитаси йиғилишида шундай баёнот берди. Рубио Исроил раҳбарияти Туркиянинг Сурияда “мавжудлиги”дан хавотирда эканини айтди.
Менимча, асосий омиллардан бири Сурия ҳудудидаги чет эл ҳарбий базалари масаласи бўлади. Ўтиш даври ҳукумати маълум бир босқичда чет эл ҳарбий базаларини жойлаштиришга рухсат бериш ёки бермаслик тўғрисида қарор қабул қилиши керак бўлади. Бу Россияга тааллуқли, аммо Туркияга ҳам тегишли бўлиши мумкин, чунки у ҳам, мамлакатнинг марказий қисмида базаси бўлишини хоҳлайди, деди Рубио.
Шу билан бирга, у Суриядаги вазият ҳозир барқарор экани ва ўтиш даври ҳукумати уни “инқилоб ёки Исроилга қарши ҳужумлар учун майдон” сифатида кўрмаётганини айтди.
Исроил Туркиянинг Сурияда ҳарбий базаси бўлишига қарши
8 апрель куни Исроил бош вазири Биньямин Нетаньяху Сурияда Туркия ҳарбий базаларининг бўлишига қарши чиқишини айтганди. У, шунингдек, Туркия ва Исроил ўртасидаги зиддиятларни ҳал этишда АҚШ президенти Дональд Трамп воситачилик қилиши мумкинлигини истисно этмаган.
9 апрель куни Туркия ташқи ишлар вазири Ҳоқон Фидан унинг мамлакати Сурияда, жумладан, Исроил билан ҳам, ҳеч қандай тўқнашувга киришмоқчи эмаслигини айтган. Шу билан бирга, у Исроилнинг Суриядаги ҳаракатларини қоралаб, яҳудий давлати у ердаги турли ҳарбий нишонларга доимий ҳужумлар уюштиришини танқид қилган. Вазир Туркия Суриянинг янги ҳокимияти билан хавфсизлик каби бир қанча масалаларда ҳамкорлик қилаётганини билдирган.
Изоҳ (0)