Исроил ҳарбийлари “Гидеон аравалари” операцияси доирасида Ғазо секторида “кенг кўламли қуруқликдаги операциялар”ни бошлади. Бу ҳақда Исроил Мудофаа кучлари хабар берди.
Операцияларда амалдаги ҳарбий хизматчилар ҳам, захирадагилар ҳам иштирок этади. Ўтган ҳафта давомида Исроил ҳарбий-ҳаво кучлари қуруқликдаги операцияларни қўллаб-қувватлаш ва ҲАМАС ҳаракатини тўхтатиш учун гуруҳнинг 670 дан ортиқ объектларига зарба берган. Нишонлар орасида қурол-яроғ омборлари, танкка қарши ракеталарни учириш мосламалари, ер ости инфратузилмаси объектлари ва ҲАМАС аъзолари бўлгани айтилмоқда.
Исроил ҳарбийлари 17 май куни “Гидеон аравалари” операцияси бошланганини эълон қилди. Асосий режа “ҲАМАС жангчиларидан тинч аҳолини ажратиш ва армияга ҳаракат эркинлигини таъминлаш учун тинч аҳолини жанг ҳудудларидан, жумладан Ғазо шимолидан жанубига кўчириш”дан иборат.
Исроил Ғазо секторидаги операцияни кенгайтиришга қарор қилгани ва бунинг учун "ўн минглаб" захирачиларни жалб қилмоқчи экани ҳақида май ойи бошида The Times of Israel ва Bloomberg хабар берган эди. 13 май куни Исроил бош вазири Биньямин Нетаньяху армия яқин кунларда “тўлиқ куч билан” Ғазо секторидаги ҳарбий операцияни якунлашга киришишини, бу эса ҲАМАСнинг мағлубиятини англатишини айтганди.
Изоҳ (0)