АҚШ Сенати президент Дональд Трампнинг қудаси Чарльз Кушнерни АҚШнинг Франциядаги элчиси лавозимига тасдиқлади. Бу ҳақда Politico нашрида хабар бермоқда.
Ма`лум қилинишича, Чарльз Кушнер душанба куни Сенат томонидан АҚШнинг Франциядаги элчиси этиб тасдиқланган. Бу, унинг оғир жиноятлари учун судланганлиги президент афви натижасида бекор қилинганига қарамай юз берган.
Кушнернинг ўғли Жаред Трампнинг биринчи президентлик муддатида унинг катта маслаҳатчиси лавозимида ишлаган. У Трампнинг ташқи сиёсатдаги энг муҳим ютуқларидан бири ҳисобланган Исроил ва бир қатор араб давлатлари ўртасидаги Иброҳим келишувларини имзолашга кўмаклашган.
Кушнер лавозимга 51 та “розилик” ва 45 та “қарши” овоз билан тайинланди.
70 ёшли бизнес-магнат Кушнер Companies номли хусусий кўчмас мулк компаниясининг асосчиси бўлиб, у шунингдек адвокатлик билан ҳам шуғулланган. Унинг ўғли Жаред Кушнер Трампнинг қизи Иванкага уйланган.
2005 йилда Кушнер сохта солиқ декларацияларини топшириш, гувоҳларга тазйиқ ўтказиш ва Федерал сайлов комиссиясига ёлғон маълумот бериш айбловлари бўйича ўзини айбдор деб тан олган. У икки йил қамоқда ўтирган. 2020 йил декабрь ойида, биринчи муддати тугашидан сал олдин, Трамп уни афв этган.
Дональд Трамп 2024 йил декабрь ойида ўз қудаси Чарльз Кушнер номзодини АҚШнинг Франциядаги элчиси лавозимига тавсия этган эди. У Кушнерни мамлакатни муносиб тарзда тақдим этадиган ва унинг манфаатларини ҳимоя қиладиган ажойиб бизнес етакчиси сифатида таърифлаган.
Изоҳ (0)