Бирлашган Миллатлар Ташкилоти Хавфсизлик кенгаши АҚШнинг Ғазода тинч аҳолини ҳимоя қилиш ва ёрдам етказиш учун зудлик билан барқарор ўт очишни тўхтатишга чақирувчи резолюция лойиҳасини овозга қўйишга тайёрланмоқда. Бу ҳақда Euronews хабар берди.
Ҳужжат 7 октябрь куни ҲАМАС томонидан гаровга олинганларни озод қилишга чақиради. Шу билан бирга, Вашингтон қочқинлар билан гавжум бўлган Рафаҳда Исроилнинг қуруқликдан операция ўтказиш ниятига очиқчасига қарши чиқади. Яқин Шарққа сафар қилаётган АҚШ давлат котиби Энтони Блинкен Исроил бош вазири Биньямин Нетаньяху ва ҳарбий Вазирлар маҳкамаси аъзолари билан учрашиб, Вашингтон позициясини батафсил баён қилишни режалаштирмоқда.
Рафаҳдаги йирик ҳарбий операция хато бўлган бўларди. Биз буни қўллаб-қувватламаймиз. Бу ҲАМАС билан муаммони ҳал қилишда ҳам керак эмас. Келгуси ҳафта бизда исроиллик ҳамкасбларимиз билан мазкур муаммони бошқача ҳал қилиш бўйича фикрларимизни баён қилиш имкони бўлади, — дейди Блинкен.
Ғазонинг бир ярим миллионга яқин аҳолиси Рафаҳда тўпланган. БМТ маълумотларига кўра, одамлар очликдан азият чекмоқда. ЖССТ раҳбари очарчиликнинг олдини олиш учун биринчи навбатда қуруқликдаги транспортни кўпайтириш ҳисобига анклавга озиқ-овқат етказиб бериш зарурлигини айтган.
Қатар пойтахти Доҳада Ғазо бўйича музокаралар давом этмоқда. 22 март куни “Моссад” раҳбари Девид Барнеа Марказий разведка бошқармаси директори Уилям Бернс, Қатар бош вазири Муҳаммад бин Абдулраҳмон Ол Тани ва Миср разведка хизмати раҳбари Аббос Камел билан учрашади. Томонлар потенциал сулҳ ва Ғазодаги гаровга олинганларни озод қилиш бўйича келишувни муҳокама қилади.
Изоҳ (0)