Туркия ва Исроил Сурияда кучайиб бораётган танглик сабаб 7/24 тартибда ишлайдиган телефон линияси ташкил қилди. Икки давлат бу орқали ҳар қандай ҳарбий можаронинг олдини олишни мақсад қилган. Аввалроқ томонлар Озарбайжон пойтахти Боку шаҳрида бевосита музокаралар бошлаган эди.
Башар Асад ҳокимияти қулагандан сўнг қуролли мухолифатни узоқ йиллардан буён қўллаб-қувватлаб келган Туркия муҳим ўйинчига айланди. Исроил ҳукумати эса ўз чегаралари олдида юзага келган янги воқеликдан хавотир билдириб, турк ҳарбий кучларининг Сурияга жойлаштирилишига қарши чиқди.
Биньямин Нетаньяху ва унга яқин хавфсизлик манбалари Аҳмад аш-Шаръа бошчилигидаги Сурия ҳукуматини бир неча бор “радикал жиҳодчилар” деб атади. Шунингдек, Исроил Туркиянинг Палмира яқинидаги ҳарбий аэродромларни ўзлаштириш ғоясига, ҳатто куч билан бўлса-да, йўл қўймаслигини таъкидлади.
Бир-бирига ёғдирилган танқидлар ва кескин риторикага қарамай, томонлар апрель ойидан Боку шаҳрида музокаралар бошлади. Шунингдек, қуролли тўқнашувларнинг олдини олиш учун механизм ишлаб чиқишга келишиб олинди.
Туркия расмийлари, жумладан президент Эрдўғон Сурия масаласига бир неча бор тўхталиб, “мамлакатни парчалаш ва суверенитетини бузишга қаратилган уринишларга тоқат қилинмаслиги”ни таъкидлади. Бироқ Исроил Суриянинг ҳарбий инфратузилмаси, қурол-яроғ омборларига зарбаларини тўхтатмади. Бу эса томонлар ўртасида тўқнашув хавфини кескин ошириб юборди.
“Палмира чизиғи”
Музокаралардан хабардор манбанинг Middle East Eye нашрига айтишича, Исроил ҳукумати турк қуруқлик кучлари, жумладан танклар ва пиёда қўшинларининг Сурияга жойлаштирилишига жиддий эътироз билдираётгани йўқ. Тель-Авивни кўпроқ ҳаво мудофаа тизимлари ва радарлар ташвишга солмоқда. Чунки улар Исроил ҳаво кучлари фаолият доирасини чеклаши мумкин.
Учрашувлар ижобий давом этмоқда, муҳокамалар “Палмира чизиғи” деб аталувчи йўналишга қаратилган. У ерда жойлашган базалар “кулранг зона” саналади; Исроил томони Туркиянинг шу чизиқдан шимолга қўшин жойлаштиришига рози бўлиши мумкин”, дейди нашр манбаси.
Ўтган ой Анқара Палмира яқинидаги Т4 ҳаво базасини ўзлаштириб, ҳужумкор дронлар ва бошқа активларини жойлаштирмоқчи бўлди. Турклар буни ИШИД террорчилик гуруҳига қарши курашда Сурия, Ироқ, Ливан ва Иорданияни каби давлатларни ўз ичига олган минтақавий коалицияни қўллаб-қувватлаш истаги билан изоҳлади. Шу каби хабарлар фонида Исроил ҳаво кучлари мазкур базани бир неча бор нишонга олиб, инфратузилмани издан чиқарди.
Мана шу воқеалар фонида турклар базани ҳимоя қилиш ва ҳаво ҳужумларининг олдини олиш мақсадида Россиядан сотиб олинган С-400 ҳаво мудофаа тизимини жойлаштириши мумкинлиги ҳақида хабарлар пайдо бўлди. Бу эса Тель-Авивни янада сергак торттирди. Боиси Сурия осмонининг ёпилиши Исроилнинг Эронга зарба бериш имкониятларини чеклайди.
Бироқ музокаралар Анқара ва Тель-Авив билан чекланиб қолгани йўқ. MEE нашрининг ўз манбасига таяниб хабар беришича, Боку Исроил ва Сурия музокаралари учун ҳам мезбонлик қиляпти.
Изоҳ (0)