Ғазо секторидаги айрим ярадорлар дори тақчиллиги ва шифохоналарга киришда муаммолар туфайли анестезиясиз ампутация қилинмоқда. Бу ҳақда ЖССТ вакили Кристиан Линдмаерга таяниб, “РИА Новости” хабар берди.
“Ғазода яраланганлар анестезиясиз ампутация қилинмоқда. Мен пропорция сини билмайман, бу ампутациянинг 10 фоиз, 20 фоиз ёки ҳатто бир фоизини ташкил қилиши мумкин. Гап бунда эмас, агар бу фақат бир марта содир бўлса ҳам, буни қабул қилиб бўлмайди”, — деди у.
Брифинг чоғида у Ғазода анестезия ва бошқа мақсадларда дори воситалари етишмаслиги, шифохоналар гавжумлиги, бу минглаб ярадорларнинг тиббий ёрдам олишини қийинлаштираётганини тушунтирди.
Бунгача Халқаро қизил хоч қўмитаси Ғазо секторидаги оғир яраланган минглаб тинч аҳолининг шифохоналарга бориш имкони йўқлигини айтди. Исроил ҳужумлари оқибатида Ғазода ҳалок бўлганлар сони 10 мингдан ошди, уларнинг 4 мингдан ортиғи болалардир. Вайроналар остида икки мингдан ортиқ одам қолмоқда, зарур техника етишмаслиги сабабли уларни қутқариш имконсиз.
Изоҳ (0)