Исроил Ғазо секторининг 70 фоиз ҳудудига фаластинликлар киришини чеклаб қўйди, бу ҳудудлардан аҳоли мажбуран кўчирилмоқда. Бу ҳақда Al Jazeera хабар берди.
Ғазо жанубидаги Рафаҳ шаҳрининг катта қисми тақиқланган ҳудуд деб эълон қилинган. Исроил ҳарбийлари март ойи охиридан мажбурий кўчиришга буйруқ беришни бошлаган. Шимолда ҳам деярли бутун Ғазо ҳудуди худди шундай ҳолатда. Шужаеа квартали шарқидаги ва Исроил чегарасидаги ҳудудларга ҳам кириш чекланган. Фақатгина шаҳар шимоли-ғарбидаги кичик ҳудудларга кириш имконияти мавжуд.
Қуйидаги анимацион харитада Исроил ҳарбийлари 18 март кунидан бери мажбуран кўчириш эълон қилган ҳудудлар тасвирланган.
Исроил бош вазири Биньямин Нетаньяху 5 май куни Ғазонинг икки миллиондан ортиқ аҳолисини Исроил қўшинлари эгаллаган ҳудудга кўчирилишини айтганди. Шу тариқа яҳудий давлати ҳудуддаги ўзининг мавжудлигини мустаҳкамлашни кўзлаган.
Фаластинликлар фикрича, Исроил нафақат ҲАМАСнинг ҳарбий салоҳиятини йўқ қилишга, балки Ғазо аҳолисини ҳам йўқ қилишга ҳаракат қилмоқда.
Ғазода тинчлик музокаралари уруш соясида қолмоқда
Икки ой давом этган ўт очишни тўхтатиш бўйича келишувдан кейин Исроил 18 мартга ўтар кечаси Ғазога авиазарбалар беришни тиклади. ҲАМАС нишонга олиниши айтилган дастлабки ҳужумларда 400 дан ортиқ одам ҳалок бўлди, уларнинг аксарияти болалар ва аёллар ҳисобланади. Бундан ташқари, 560 дан ортиқ киши жароҳатланди.
Ҳужумни қайта тиклаш буйруғи Исроил бош вазири Биньямин Нетаньяху ва мудофаа вазири Исроил Кац томонидан берилган. Улар ўт очишни тўхтатиш режимини узайтириш бўйича музокараларда олдинга силжиш йўқлигига жавобан шундай қарор қабул қилган. Нетаньяху айбни тўғридан тўғри ҲАМАСга юклаган.
Келишувнинг иккинчи босқичи Исроилдан ўз кучларини Ғазодан олиб чиқишни талаб қиларди. Ҳатто 19 январда кучга кирган ва Исроил қамоқхоналаридаги фаластинликлар эвазига гаровдагилар озод этилган биринчи босқичда ҳам Исроил Ғазода 150 дан ортиқ фаластинликни ўлдирган.
Исроил бош вазири Ғазодаги “барча кутилмаган қурбонлар” учун ҲАМАС жавобгар эканини даъво қилган. У Ғазода юзлаб одам ўлимига сабаб бўлган ҳужумлар “фақат бошланиши” эканини таъкидлаган.
Изоҳ (0)