Халқаро Amnesty International инсон ҳуқуқлари ташкилоти Исроил Ғазо сектори ва Ливанга қарши оқ фосфорли ўқ-дорилардан фойдаланганини тасдиқлади. Бу ҳақда ташкилотнинг инқироз бўйича катта маслаҳатчиси Донателла Ровера Sky News телеканалида маълум қилди.
Ташкилот Ливандаги Исроил ўқлари қурбонларини даволаган шифокорлар билан боғланганини айтди. Роверанинг сўзларига кўра, у ерда оқ фосфордан фойдаланиш оқибатида камида тўққиз киши жароҳатланган.
“Биз, Amnesty International, Ғазода ҳам, Ливанда ҳам оқ фосфор ишлатилганини тасдиқладик”, — деди Донателла Ровера.
31 октябрь куни Ливаннинг ННА агентлиги Ливан жанубидаги иккита аҳоли пунктининг чеккалари Исроил ҳудудидан отилган фосфорли снарядлар билан ўққа тутилганини хабар қилди.
Инсон ҳуқуқлари бўйича Human Rights Watch (HRW) ташкилоти Исроил армияси 10 ва 11 октябрь кунлари Ливан ва Ғазо секторини ўққа тутишда халқаро конвенция ларда тақиқланган оқ фосфорли ўқ-дорилардан фойдаланганини маълум қилди.
Аввалроқ Фаластин Ташқи ишлар вазирлиги Исроил кучлари томонидан оқ фосфор қўллангани ҳақида хабар берганди. БМТ эса бундай қуроллар қўллангани ҳақида ҳеч қандай хабар олмаганини таъкидлаган.
Исроил Ташқи ишлар вазирлиги матбуот котиби Лиор Ҳаят Amnesty International халқаро ноҳукумат ташкилоти Исроилга қарши “антисемитизм ва нохолис” эканини иддао қилган.
АҚШ Давлат департаменти Ғазо секторида Исроил томонидан тақиқланган оқ фосфорли ўқ-дорилардан фойдаланганига оид далил йўқлигини айтади. ЖССТ ҳам октябрь ойи ўрталарида Ғазо секторида оқ фосфордан фойдаланиш қурбонлари ҳақида ҳеч қандай маълумотга эга эмаслигини айтган.
Фосфорли ўқ-дорилар нега хавфли?
Оқ фосфорли ўқ-дорилар кимёвий хоссалари ва ундан фойдаланиш оқибатлари туфайли хавфлидир. Қуйида асосий сабабларни келтириб ўтамиз:
Юқори ёниш ҳарорати: Оқ фосфор жуда юқори ҳароратларда ёнади, бу эса одамларга жиддий куйиш ва шикастланишга олиб келиши мумкин.
Заҳарли буғланиш: оқ фосфор ёнганда фосфор оксиди каби заҳарли буғлар ҳосил бўлади. Ушбу моддалардан нафас олиш инсон саломатлигига зарар етказиши ва тана тизимларида турли муаммоларни келтириб чиқариши мумкин.
Узоқ вақт ёниш: Оқ фосфор ҳатто сув остида ҳам узоқ вақт ёниши мумкин, бу унинг оқибатида келиб чиққан ёнғинларни ўчиришни қийинлаштиради.
Атроф-муҳитга таъсири: у ёнганда ҳосил бўладиган заҳарли бирикмалар тупроқ, сув ва ҳавони ифлослантириши мумкин ва бу тирик организмлар, экотизимларга жиддий зарарли таъсир кўрсатади.
Изоҳ (0)