Жаҳон соғлиқни сақлаш ташкилоти (ЖССТ) раҳбари Тедрос Аданом Гебрейесус Исроил раҳбариятини Рафаҳда қуруқликдаги операция ўтказиш ғоясидан воз кечишга чақирди. Бу ҳақда “Коммерсант” хабар берди.
Гебрейесуснинг сўзларига кўра, Рафаҳга бостириб кириш “гуманитар фалокатга” олиб келади.
Биз Исроилни бундай ҳаракатларини давом эттирмасликка чақирамиз. Барча томонлардан ўт очишни тўхтатиш ва мустаҳкам тинчликка эришиш учун ҳаракат қилишни сўраймиз, — деди Гебрейесус Х ижтимоий тармоғида.
Тегишли баёнот БМТнинг Фаластинлик қочқинларга ёрдам кўрсатиш агентлиги (UNRWA) бош комиссари Филипп Лаццарини билан учрашувдан сўнг эълон қилинди. Йиғилишда Ғазо секторидаги гуманитар блокадани бекор қилиш чоралари, шунингдек, анклавда касалликларнинг тарқалиш хавфи муҳокама қилинган.
30 апрель куни Исроил бош вазири Биньямин Нетаньяху Исроил ҳарбий кучлари гаровга олинганларни озод қилиш бўйича ҲАМАС билан олиб борилган музокаралар натижаси қандай бўлишидан қатъи назар, Ғазо секторидаги Рафаҳ шаҳрида операция ўтказишини айтди. Шунингдек, у Исроилга “ҲАМАС устидан тўлиқ ғалаба қозониш учун” Рафаҳдаги операция зарурлигини таъкидлади.
29 апрель куни Исроил ва ҲАМАС ўртасидаги музокаралар чоғида Фаластин гуруҳига 40 кунлик ўт очишни тўхтатиш ва гаровга олинганларни алмашиш таклиф қилинган. АҚШ Миллий хавфсизлик кенгашининг стратегик алоқа координатори Жон Кирбининг айтишича, ҲАМАСнинг келишувга розилиги Исроилнинг Рафаҳдаги операциясини кечиктириши мумкин.
Изоҳ (0)