Ғазо секторидаги соғлиқни сақлаш тизими таъмирланмаса, портлашлардан кўра кўпроқ одам касалликдан ўлиши мумкин. Бу ҳақда Жаҳон соғлиқни сақлаш ташкилотига таяниб, Al-Arabiya хабар берди.
Исроилнинг Ғазони бомбардимон қилиши оқибатида 15 мингдан ортиқ одам ҳалок бўлди, уларнинг 40 фоизга яқини болалар.
“Агар соғлиқни сақлаш тизимини тиклай олмасак, одамлар бомбардимондан кўра кўпроқ касалликдан ўлаётганини кўрамиз”, — деди ЖССТ вакили Маргарет Харрис Женевадаги БМТ брифингида.
У юқумли касалликлар, хусусан, диарея касалликлари авж олиши ҳақидаги хавотирларини такрорлади. Ғазо шимолидаги кўчирилган аҳолининг яшаш шароитлари ҳақидаги БМТ ҳисоботига иқтибос келтирган ҳолда, у шундай деди:
“Ҳеч қандай дори-дармон, эмлаш тадбирлари йўқ, хавфсиз сув, гигиена ва озиқ-овқатдан фойдаланиш имкони йўқ. Биз чақалоқлар орасида диарея ҳолатларини жуда кўп кўрдик”, — деди у.
Маргарет Харрис Ғазо шимолидаги Ал-Шифо касалхонаси фаолияти тўхтаганини “фожиа” деб таърифлади ва ЖССТ эвакуация карвони пайтида унинг тиббий ходимларининг бир қисми Исроил кучлари томонидан ҳибсга олинганидан хавотир билдирди.
БМТнинг Ғазодаги болалар агентлиги матбуот котиби Жеймс Элдер Ғазодаги касалхоналар урушдан яраланган ва ифлос сув ичишдан гастроэнтерит билан касалланган болалар билан тўлганини айтди.
“Мен жуда кўп ота-оналарни учратдим... Улар фарзандларига нима кераклигини яхши билади. Улар хавфсиз сувга эга эмаслар ва бу жиддий қийинчиликларни келтириб чиқаради”, — деди у.
У оёғининг бир қисмидан ажралган болани бир неча соат давомида шифохонада полда ётганини, тиббий ходимлар етишмаслиги сабабли даволанмаганини тасвирлаб берди.
Изоҳ (0)