Исроил парламентида Ғазога ҳужумни ва одамлар ўлдирилишини қоралаган депутат Айман Ода куч билан минбардан олиб кетилди. Бу ҳақда The Guardian хабар берди.
Ҳодиса 21 май куни Кнессетда (парламент) юз берган. Айман Ода бир ярим йиллик уруш давомида 19 минг бола ўлдирилганини айтган.
Ғазода 53 минг киши ҳалок бўлди. Сиз барча университет ва шифохоналарни вайрон қилдингиз. Буларнинг барчаси сиёсий ғалабасиз. Сиз ўзининг ғалаба йўқлигини ҳис қиласизми? Нега ақлдан озяпсиз? Нега бу қадар ожизсиз? Фақат ўлим, вайрон бўлган шифохоналар ва университетлар... Фақат тинч аҳолига, бегуноҳ одамларга қарши уруш. Буларнинг барчасини сиз амалга оширмоқдасиз. Сиз ожизсизлар, деган Айман Ода парламентдаги нутқида.
Исроил депутати 20 май куни ҳам парламентда Ғазодаги қирғинни қоралаб нутқ сўзлаганди. У “ҳукуматга ва унинг Ғазодаги жиноятларига қарши ҳақиқий мухолифат” бўлишга чақирган.
Армия — бу жиноят, ўлдириш, қотиллик, бу қирғин, дея бақирган у.
Айман Оданинг баёноти бошқа депутатларнинг қаттиқ эътирозига сабаб бўлган. Ўшанда ҳам у Кнессет мажлисидан чиқариб юборилган. Бунга жавобан, депутатнинг “Ҳадаш” партияси парламент амалда урушга қарши нутқларнинг олдини олаётганини маълум қилган.
Исроилнинг Ғазога қарши уруши оқибатида камида 53 655 нафар фаластинлик ҳалок бўлди, 121 950 нафари яраланди. Бедарак йўқолган минглаб одамлар вайроналар остида бўлиши мумкин. Улар билан қурбонлар сони 61,7 мингдан ортиқ кишига етиши маълум қилинди.
Изоҳ (0)