Исроил армияси 17 октябрь куни кечқурун Ғазо секторининг марказий қисмида жойлашган Ал-Аҳли касалхонасига авиазарба берди. Фаластин томони маълумотларига кўра, 800 дан ортиқ одам ҳалок бўлган. Исроил ҳарбийлари шифохонага ҳужумда Фаластиннинг “Ислом жиҳоди” гуруҳини айбламоқда. Гуруҳ айбловларни рад этди.
Гувоҳлар шифохонадаги манзара даҳшатли экани, қонга беланган ва яраланганлар билан тўлиб кетганини айциҳди. Қайд этилишича, Ғазода юзлаб ички кўчирилганлар ушбу шифохона ҳудудини бошпана қилган эди.
Ғазо соғлиқни сақлаш вазирлиги шифохонада ҳалок бўлганларнинг барчаси фуқаролик шахслари бўлганини таъкидлади.
Фаластин президенти Маҳмуд Аббос шифохонада ҳалок бўлган қурбонлар хотирасига давлатда уч кунлик мотам эълон қилди.
Халқаро реакция
Жаҳон етакчиларидан Туркия президенти Ражаб Тоййиб Эрдўғон биринчилардан бўлиб Ғазодаги шифохонага Исроил томонидан авиазарба берилганини қоралаб чиқди ва жаҳон ҳамжамиятини Фаластин анклавидаги “мисли кўрилмаган шафқатсизлик”ни тўхтатишга чақирди.
“Аёллар, болалар ва ҳеч нарсада айбсиз бўлган тинч аҳоли вакиллари бўлган касалхонага зарба бериш — бу Исроилнинг элементар инсоний қадриятлардан холи бўлган ҳужумларининг намунасидир. Мен бутун инсониятни Ғазо секторидаги бу мисли кўрилмаган шафқатсизликни тўхтатишга чақираман”, — деб ёзди Эрдўғон Х (собиқ Twitter) ижтимоий тармоғида.
Пентагон Исроил авиазарбаси тўғрисидаги хабарларга муносабат билдирдириб, “АҚШ Исроилни “уруш қонунлари”га риоя қилишга чақиради”, деб баёнот берди.
Эрон Ташқи ишлар вазирлиги вакили “Ғазо секторидаги касалхонага ҳужум шафқатсизлик билан амалга оширилган жиноят бўлиб, сионистик режим уруш чоғида асосий халқаро принципларга риоя қилмаслигини намойиш этади”, дея баёнот берди.
Иордания қироли Ғазодаги касалхона портлашини “қирғин” ва “ҳарбий жиноят” деб атади.
Бундан ташқари, Иордания ташқи ишлар вазирлиги 18 октябрь куни АҚШ президенти Жо Байден билан ўтадиган олий даражадаги учрашувни бекор қилди. Жо Байден билан учрашувда Иордания президенти Айман Сафадий, Миср президенти Абдулфаттоҳ ас-Сисий, Фаластин мухторияти раиси Абу Мазен иштирок этиши кутилаётган эди.
Жаҳон соғлиқни сақлаш ташкилоти ҳам Ғазо секторидаги касалхонага ҳужумни қатъий қоралади.
“Тинч аҳоли ва тиббиёт муассасаларини ҳимоялашнинг зарур чораларини кўришга чақирамиз”, — дейди ЖССТ бош директори Тедрос Аданом Гебрейсус.
Европа Иттифоқи ташқи сиёсий хизмати раҳбари Жозеп Боррел Ғазодаги ҳоспиталга зарбани “даҳшатли жиноят” деб атади ва “айбдорларни жазога тортиш”га чақирди.
Изоҳ (0)