Исроил бош вазири Биньямин Нетаньяху Ғазо секторининг бутун ҳудудини ҳарбий назоратга олиш ниятида эканлигини маълум қилди. Бу ҳақда у 19 май куни ўзининг Telegram каналида эълон қилинган видеомурожаатда айтиб ўтди.
Нетаньяху ҳарбий ҳаракатларнинг мақсадлари ўзгармаганини таъкидлаб, булар Фаластиннинг ҲАМАС радикал ҳаракатини тор-мор этиш ва Ғазода гаровга олинган исроилликларни озод қилиш учун эканлиги билдирган. Шунингдек, у яқин келажакда Исроил АҚШ билан ҳамкорликда Ғазо аҳолисининг гуманитар ёрдамдан фойдаланишини таъминлаш ва ҲАМАСнинг уни талон-торож қилишининг олдини олиш учун тарқатиш пунктлари тармоғини ташкил этишини қўшимча қилди.
“Бу ҲАМАСни йўқ қилишнинг бир қисми бўлиб, кучли ҳарбий босим, кенг кўламли босқинимиз ва амалда бутун Ғазони назоратга олиш ҳамда ҲАМАСни инсонпарварлик ёрдамини талон-торож қилиш имкониятидан маҳрум этиш билан бир вақтда амалга оширилади. Мана шу ҳарбий режа ва ғалаба режаси”, деди Нетаньяху.
Бош вазир анклавдаги кейинги ҳаракатлар режаси ҳақида сўз юритаркан, Исроил армияси ҳозир у ерда “жуда катта, шиддатли ва кучли фаолият” олиб бораётганини таъкидлаган.
“Биз секторнинг бутун ҳудудини назоратга олишни режалаштирмоқдамиз. Бу биз қилмоқчи бўлган иш”, деди у.
18 май куни Исроил армияси “Гидеон аравалари” номли кенг кўламли қуруқлик операцияси доирасида анклавнинг шимолий ва жанубий ҳудудларида жанговар ҳаракатлар бошланганини эълон қилди. Унда бешта дивизия иштирок этмоқда.
Май ойи бошида Исроил Ғазо сектори аҳолисини минтақа ташқарисига чиқариш мақсадида “Гидеон аравалари” махсус операция ўтказиши ма`лум қилинганди. Операция доирасида анклав жанубида ягона гуманитар ҳудуд ташкил этилиши режалаштирилган бўлиб, у ерда 2 миллионга яқин тинч аҳоли жойлаштирилиши кўзда тутилган.
Айтилишича, Миср ва Ғазо сектори чегараси яқинида 50-70 квадрат километрлик майдон доирасида зона ташкил этилади.
Изоҳ (0)