Исроил Эрон ядровий объектларига зарба бериш учун тайёргарлик кўрмоқда. Бу ҳақда разведка маълумотлари билан таниш бўлган АҚШ расмийларига таяниб CNN хабар берди.
Исроил расмийлари ҳужум учун якуний қарор қабул қилганми ёки йўқми, номаълум. Оқ уй ҳам яҳудий давлатининг режалари борасида умумий қарашга эга эмас. Исроилнинг ҳаракатлари АҚШ ва Эрон ўртасидаги ядровий музокараларининг кечишига боғлиқ бўлиши кутилмоқда.
Исроилнинг Эрон ядровий иншоотига зарба бериш эҳтимоли сўнгги ойларда сезиларли даражада ошган, дейди разведка билан таниш мулозим.
Унинг сўзларига кўра, Вашингтон ва Теҳрон ўртасидаги уранни бойитишдан воз кечилмайдиган келишув эҳтимоли “зарба эҳтимолини оширади”.
АҚШ ядровий объектлар нишонга олинса, жавоб ҳужумидан Исроилни ҳимоя қилиш учун разведка маълумотлари тўплашни кучайтирмоқда. Трамп маъмуриятига яқин амалдорга кўра, АҚШ Исроил ҳарбийларига ядровий объектларга ҳужумга тайёргарлик кўришда ёрдам бермаслиги мумкин.
Агар Исроил зарба беришга қарор қилса, бу Трамп билан муносабатларнинг узилишига олиб келади ва АҚШ четлаб ўтмоқчи бўлган Яқин Шарқдаги кенгроқ минтақавий можарони келтириб чиқаради, дея таъкидлайди CNN.
Собиқ разведка ходими Жонатан Паникофф фикрича, Исроил бош вазири Биньямин Нетаньяху уларга тўғри келмайдиган АҚШ-Эрон келишувидан қочишга ҳаракат қилмоқда. Бироқ айни пайтда Трампнинг қўллаб-қувватлашини сақлаб қолмоқчи.
The New York Times газетаси Исроил май ойида Эрон ядровий иншоотларига зарба беришни режалаштиргани, бироқ Трамп Теҳрон билан музокаралар бошлангани туфайли режадан воз кечганини айтганди. Шунга қарамай, Исроил расмийлари яқин ойларда ҳужум уюштириш имкониятини кўриб чиқмоқда.
The Washington Post нашри ёзишича, Трампнинг миллий хавфсизлик бўйича собиқ маслаҳатчиси Майк Уолц Исроилнинг ҳарбий куч ишлатиш зарурлиги ҳақидаги фикрига қўшилган. Шу сабабли АҚШ президенти Уолцни бу лавозимдан олиб ташлагани айтилмоқда.
Изоҳ (0)