Исроил армияси аскарлари Ғазодаги аш-Шифа касалхонасида ҳарбий амалиёт ўтказгандан сўнг, мазкур ҳудудни тарк этмоқда. Бу ҳақда Al Jazeera хабар берди.
Хабарга кўра, Исроил қўшинлари икки ҳафта давом этган ҳарбий амалиётдан сўнг Аш-Шифа мажмуаси ва унинг атрофидан тўлиқ чиқиб кетмоқда.
Тиббиёт мажмуаси бинолари ёниб кетган ёки яроқсиз ҳолга келган, вайронагарчилик кўлами жуда катта. Қўшинлар кетгач, шифохона ҳудуди ва унинг атрофидаги кўчаларда ўнлаб жасадлар топилган.
Исроил Бош вазири Биньямин Нетаньяху 31 март куни бўлиб ўтган матбуот анжуманида ҳарбийлар 18 март куни Аш-Шифа тиббиёт марказида бошланган операция давомида 200 дан ортиқ қуролли радикални йўқ қилганини айтган.
Бош вазирнинг сўзларига кўра, мазкур касалхона ҲАМАС ҳаракатининг марказий қароргоҳига айлантирилган. Исроил армияси тинч аҳолига, беморларга, тиббий гуруҳларга ёки жиҳозларга зарар етказмасдан эҳтиёткорлик билан ҳаракат қилишини таъкидлаган эди. Бироқ Жаҳон соғлиқни сақлаш ташкилоти раҳбари Тедрос Адҳаном Гебрейесуснинг айтишича, 18 мартдан бери тиббиёт мажмуасида 21 нафар тинч аҳоли вакиллари вафот этган.
Ғазо Соғлиқни сақлаш вазирлиги берган сўнгги ҳисоботга кўра, Ғазодаги қурбонлар сони 7 октябрдан бери 32 782 кишига етган, 75 298 киши жароҳатланган.
Изоҳ (0)