Исроил Ғазо сектори аҳолисини минтақа ташқарисига чиқариш мақсадида “Гидеон аравалари” махсус операция ўтказади. Бу ҳақда БАА нашри Тҳе Натионал хабар бермоқда.
Маълумотларга кўра, “Гидеон аравалари” операцияси доирасида анклав жанубида ягона гуманитар ҳудуд ташкил этилиши режалаштирилган бўлиб, у ерда 2 миллионга яқин тинч аҳоли жойлаштирилиши кўзда тутилган.
Айтилишича, Миср ва Ғазо сектори чегараси яқинида 50-70 квадрат километрлик майдон доирасида зона ташкил этилади.
“Бу янги Накбага жуда ўхшаб кетади”, деди бир манба, 1948 йилда Исроил давлати ташкил топган пайтда 700 000 га яқин фаластинликларнинг ўз уйларидан кўчирилишини тасвирлаш учун арабча “фалокат” ёки “офат” маъносини англатувчи сўзни ишлатиб.
“У ерда чодирлар, оддий тиббиёт марказлари ва мактаблар бўлади. Барчаси Исроил ҳарбийларининг қаттиқ назорати остида туради. Гуманитар ёрдам минимал миқдорда етказиб берилади. Тахминларга кўра, фаластинликлар учун у ерда яшаш шунчалик оғир бўладики, уларнинг кўпчилиги кетишни хоҳлайди”, деган нашр манбаси.
Таъкидланишича, Исроил ҳужумининг фаоллашуви ва фаластинликларни Ғазо жанубига кўчириш режаси ҳақидаги хабарлар АҚШ президенти Дональд Трампнинг Саудия Арабистони, БАА ва Қатарга ташриф буюрадиган Яқин Шарққа муҳим сафаридан бир ҳафтадан сал олдинроқ пайдо бўлган.
Январь ойида АҚШ президенти Дональд Трамп Ғазо аҳолисини учинчи мамлакатларга кўчириш ва анклав ўрнида курорт зонаси барпо этиш ниятини билдирган эди. Бу таклифларга кўра, АҚШ Ўрта Ер денгизининг шарқий соҳилидаги ҳудудларни эгаллаб олиб, уни ҳашаматли пляж курортига айлантирмасдан аввал Ғазодаги фаластинликларни асосан Миср ва Иорданияга кўчириш кўзда тутилган.
Қоҳира ва Уммон, шунингдек, дунёнинг кўплаб мамлакатлари ва БМТ агентликлари бу таклифларни қоралади, баъзилар бу режани этник тозалаш деб атади. Миср фаластинликларга нисбатан янги адолатсизликнинг бир қисми бўлмаслигини таъкидлаб, Ғазо аҳолисини қабул қилиш унинг миллий хавфсизлигига путур етказишини айтди.
Кутилаётган операция доирасида Исроил армияси (САХАЛ) минтақанинг катта қисмини ўз назоратига олиши тахмин қилинмоқда. Кўплаб биноларни бузиш режалаштирилган. Бундан ташқари, ҲАМАС ҳаракатланиш ва қурол-яроғ контрабандаси учун фойдаланадиган туннеллар тармоғини йўқ қилиш мўлжалланмоқда. Ер ости иншоотларида 2023 йил 7 октябрдаги ҳужум пайтида асирга олинган тирик исроиллик гаровлар ҳам бўлиши мумкин.
Маълум қилинишича, 2023 йил октябрда Исроил ва ҲАМАС ўртасидаги уруш бошланганидан буён Ғазо секторида 52 500 дан ортиқ фаластинлик ҳалок бўлган. Ҳудудларнинг аксарияти вайронага айланиб, аҳолининг кўпчилиги камида бир марта кўчиришга мажбур бўлган.
“Гидеон аравалари” операцияси Дональд Трампнинг Яқин Шарққа сафари якунлангач 15 майдан кейин бошланиши кутилмоқда.
Изоҳ (0)