Ҳиндистонда етти ой ичида турли штатларда яшовчи 25 нафар эркакка турмушга чиққан 23 ёшли келин фирибгарлик бўйича гумонланиб, ҳибсга олинди. Бу ҳақда The Economic Times хабар бермоқда.
Анурадҳа Пасван исмли бу аёл “Қочқин келин” лақабини олган бўлиб, у бир нечта шахслардан иборат жиноий гуруҳининг аъзоси бўлган. Келиннинг ҳаёти одатда қуйидагича ўтган: у ишонувчан ва ҳеч нарсадан бехабар эркакларга турмушга чиқиб, бир неча кундан сўнг уларнинг пуллари, қимматбаҳо тақинчоқлари ва электрон буюмлари ўғирлаб, ғойиб бўлган.
Дастлабки маълумотларга кўра, Анурадҳа Пасван аввалги эри билан маиший жанжаллар сабабли ажрашган, кейин бошқа шаҳарга кўчиб ўтиб, жиноятчилик гуруҳига қўшилган. У WhatsApp каби платформалар орқали иш юритадиган агентликлар орқали ҳаракат қилган. Бундай агентликлар келин излаб топиш билан шуғулланади.
Кўплаб фирибгарликларга алоқадор бўлган аёлни қўлга олиш учун полициячилардан бири яширинча навбатдаги куёв ролини ўйнаган. Операция давомида ундан шубҳаланган агентлардан бири аёлнинг фотосуратини маҳкамага бориб, кўрсатган, полиция эса вазиятдан фойдаланиб, уни қўлга олган.
Мазкур фирибгарлик схемаси 3 май куни Вишну Шарма исмли фуқаронинг аризасидан сўнг фош этилди. Унинг сўзларига кўра, Пасван ва Шарма 20 апрель куни турмуш қуришган, бироқ 2 май куни келин унга тегишли қимматбаҳо буюмларни олиб, уйдан чиқиб кетган.
Маълум бўлишича, фирибгарликка қўл уришидан аввал Анурадҳу Пасван Ҳиндистоннинг Уттар-Прадеш штатидаги касалхонада ишлаган. Полиция бу иш бўйича Пасвандан ташқари яна бир нечта жиноятчиларнинг шахсини аниқлаган. Фирибгарликда иштирок этганликда гумон қилинаётган гуруҳ аъзолари Бхопал шаҳрининг турли ҳудудларида яшаган. Бугунги кунда тергов ҳаракатлари давом этмоқда.
Изоҳ (0)