“Дард шукр ва сабр қилишни ўргатди”. Актриса Муножот Алимбоева витилиго касаллигини қандай енгаётгани ҳақида (видео)

“Жайдари келин” спектаклидаги роли билан севимли бўлган актриса Муножот Алимбоева “Дарё”га берган интервьюсида асл касби хонанда экани, “давосиз” касалликни бошидан ўтказгани ҳақида гапириб, ўқимаган актёр ва блогерларни танқид қилди.

“Асл касбим мусиқий театр актрисаси”

— Санъат олийгоҳининг мусиқий театр актрисаси йўналишини тамомлаганман. Беш йил давомида вокал, мақом, фортопиано — мусиқадан билим олган профессионал актриса ва хонандаман. Иккинчи курсдалигимдаёқ Муқимий театрига 2001 йилда ишга кириб, учинчи курслигимда “Алпомишнинг қайтиши” спектаклида мен Ойбарчин ролини, раҳматли Мирза Азизов Алпомишни ўйнаганмиз.

Ижтимоий тармоқларда нега энди актрисаликни ташлаб қўшиқ айтиб юрибсиз, дейишади. Йўқ, мен ҳар доим қўшиқ куйлаганман ва бунинг уддасидан чиққанман — солист-вокалистман. Ўзим билмаган касбга аралашаётганим йўқ. Лекин барибир ўзимни худди театримга хиёнат қилиб қўяётгандек ҳис қиламан, дейди Муножот Алимбоева.

“Оқ доғларимни борича қабул қилганман”

— Фарзандли бўлганимдан сўнг танамда оқ доғлар чиқишни бошлади, бу витаминлар камайиб кетганидан бўларкан. Ўшанда одамлардан ўзимни олиб қочган, стрессга тушган пайтларим ҳам бўлган. Ўзбекчиликда бу юқумли касаллик деб сингдирилган, аслида ундай эмас, умуман юқмайди, наслдан наслга ўтмайди. Шунчаки, тери рангининг ўзгариши холос.

Кўпчилик менинг қизимда шундай бўляпти, энди турмушга беролмайманми ёки укамда оқ доғлар бор, уйлантиролмаяпмиз, ҳеч ким қизини бермаяпти деб ёзиб, қандай даволанишимни сўрашади. Аслида касалликни борича қабул қилиб, бундай ёмон аҳволдамаслигимизга шукр қилишимиз керак. Мен шу тери камчилиги сабабли шукр қилишни ўргандим, бир кунда 2-3 соат вақтимни шукрона айтиш учун бағишлайман. Доим кулиб юриб, ҳеч кимдан хафа бўлмай, ҳар хил гап-сўзларни кўнгилга олмаса, бу касаллик келиб чиқмайди. Бор бўлса, кўпайиб кетмай, секин-аста камайиб боравераркан. Кимдир мени хафа қилиб қўйса тезроқ унутишни ва ичимда сақлаб юрмасликни ўргандим. Қадарга рози бўлиб, ўзимни боримча қабул қилдим, деди актриса.

“Кинога 'конфет' актёрлар ҳам керак”

— Халқ хизматлари ёки тадбирларда мени чақириб олиб, нега рол ўйнамаяпсиз, сиздек актёр-актрисалар қаёққа йўқолиб қолди, телевидениени ўқимаган чаласавод, “қаланғи-қасанғи” актёрлар босиб кетди-ку, деб дакки ҳам беришади. Ҳақиқатан ҳам балки керакдир “конфетлар”, чунки ўшаларнинг берган пули ҳам бирор кинонинг кам-кўстига ишлатилар. Лекин барибир уларга ўргатиб, маҳорат дарсини ўтаб кейин экранга олиб чиқиш керак, пулини олдик бўлди, эмас-да! Ҳозир ўзидан олдин киприги кўринадиган актрисалар чиққан, ўлим тўшагида ёки касал аҳволда ётган саҳнада ҳам ўша киприклари-ю шишган лаби, бўяб олган яноқлари билан экранга чиқади. Ахир юз ифодаси, мимика билиниши керак-ку, кўз билан айтиладиган гаплар бўлади, улама киприклар ижрочининг кўзини бутунлай тўсиб қўяди.

Биз рол ўйнаётганимизда режиссёрлар экранга бўёқлар билан чиқишга умуман рухсат бермасди, ҳатто табиий ўсма суртиб олсам ҳам қўлимга кирсовун тутқазиб, бор қошингни ўчириб кел, дейишарди. Табиийлик барибир яхши-да, рол ҳам ишонарли чиқади, дея ўзи ёшлигидаги воқеаларни эслади актриса.

Суҳбатни тўлиқ ҳолатда "Daryo Lifestyle" YouTube каналида томоша қилинг.