Кўплаб фильмлар ва спектакллари орқали севимли бўлган, ижобий-у салбий қаҳрамонлар ролини маромига етказиб ижро этувчи актриса Вазира Юнусова ижодни бошлаганига деярли 40 йил тўлди. Шу муносабат билан “Дарё” актрисадан интервью олди.
“Мўмин билан вайнда чиқишим кўпчиликка ёқади”
— Бугун ҳаётимизда ўзидан ёши катта аёллар билан муносабат қурадиган эркаклар йўқ эмас. Биз Мўмин Иброҳимов билан шу ҳақиқатни ҳазил ортида кўрсатишга ҳаракат қилдик. Биз Мўмин ва Асқар билан охиригача бирга ишлашга келишганимиз йўқ. Улар мени чақиришди, мен ўйнаб бердим. Мен актрисаман, агар вайн йўлига кирсам, шу йўлдан кетишим керак бўлади. Шу сабабли баъзан қизиқишга вайнларга тушиб тураман. Уларни яхши кўриб томоша қиладиганлар кўп. Ҳаттоки машинада светофорда турганимда ҳам олдимга келиб, “Опа, вайнни бир кунда 30 марта кўрдим, маза қилиб кулдим”, дейдиганлар бор.
Вайнларга тушишимни танқид қилганлар ҳам бўлди, аммо ўша танқид қилганларнинг ўзи ҳам шу йўналишга кириб келяпти. Мен танқидни тўғри қабул қиламан. Қизларим ҳар доим менинг ёнимда камарбаста бўлишади. Сиз бачкана вайнларга тушмаяпсиз, ҳозир замон билан ҳамнафас бўлиш керак, деб қўллаб-қувватлашади, дейди актриса.
“Фильмда профессионаллар бўлмаса, рол ўйнамайман”
— Охирги пайтлар профессионаллар бўлмаса, мени фильмларга чақирманглар, деб шарт қўйишни бошладим. Кўзи ўлик, юракни ишлатмай сўзлайдиганлар жонимизга тегган. Баъзан эпизод рол учун чақириб қолишади, келмасангиз бўлмайди, бошқа профессионаллар келмаяпти, дейишади. Шундай вазиятларда бориб, ёш актёр ва актрисалар билан ишлайман, кўзингиз ўлик бўлмасин, дейман.
Бундан ташқари, пул масаласи ғашимни келтиради. Ношукрлик бўлмасин-у, аммо гонорар кам. Шундай актёрлар бор, сериал ва новеллаларга тушмайди, фақат кинога тушади. Мен эса сериалга ҳам, кино ва новеллаларга ҳам, ҳаттоки вайнларга ҳам тушяпман. Менга ким айтган гонораримни беряпти? Яна бир ғашимга тегадиган нарса — қачон бизда ҳам кийим ва грим масаласи ҳал бўлади? Театрни гапирмайман, у ердан келадиган пулга оиламни боқаман. Шу сабабли уни кам ёки кўп, демайман. Қачон бизда ҳам машиналар орқаси тўла кийимда келиб, мана шу кийимни киясиз, дейишади? Профессионал гримёрларнинг ҳам дарди ичида. Костюмерлар йўқолиб кетди. Давлат фильмларида бор, хусусийларда йўқ. Ўзингиз кийим олиб олинг, дейишади, дейди Вазира Юнусова.
“Қабристонга бориб, лаҳад ичига тушиб тураман”
— Иккинчи қизим билан Кўкча қабристонидаги чиллахонага бориб турамиз. Аввалига қўрққанман, кейин кўникканман. Соатлаб ҳам ўтираман. “Келадиган жойимиз шу ер, нимага катта кетаман, мен ўзи кимман”, деб йиғлайдиган эркаклар ҳам бор. Мен уч йил лаҳаднинг ичига кира олмадим. Яқинда биринчи марта кирдим. Бир аёл уч ярим соат лаҳадда ухлаб қолганини, менга қўрқмаслигим кераклигини айтди. Телефонимнинг чироғи билан киргандим, кейин уни ҳам ўчирдим. Жуда дахшатли эди. Лаҳадга тушганингизда кимлигингизни биласиз. Чиққанингиздан кейин қалбингиз сокинлашади, дейди актриса кўзларида ёш билан.
“Турмуш ўртоғимга ёшроғига уйланинг, деганман”
— Мен ўлсам, майитимни ким кўтаради, деб бир мартагина ўйлаганман. Чунки учта қизим бор. Аммо мен бу нарсани чуқур ўйлаб, мулоҳаза қилмайман. Сабаби жигарларим, куёвларим бор. Баъзан театрдаги ёш актёрларга ҳазиллашиб ҳамманг менинг боламсизлар, ўтиб қолсам, тобутимни кўтарасизлар, дейман. Лекин ҳеч қачон нега менга ўғил бермадинг, деб сиқилмайман. Берган неъматларига шукр қиламан. Турмуш ўртоғим охирги қизимиз ўғил бўлишини истаган. Шунда “Унда ёшроқ бирортасига уйланинг, аммо қонуний ажрашамиз”, дедим. Аммо эрим ҳам, мен ҳам буни хоҳламаймиз. Учта қизимиз ўнта ўғилнинг ўрнини босади, дейди актриса.
Суҳбатни тўлиқ ҳолда Daryo Lifestyle YouTube саҳифасида томоша қилинг.
Изоҳ (0)