Марҳум санъаткор Шерали Жўраевнинг шогирди, хушовоз хонанда Аҳрор Усмонов санъаткорлар аслида қандай бўлиши кераклиги, нега ҳозирги айрим “юлдузлар” сабаб барча бирдек “қора” бўлиб қолаётгани ҳақида “Дарё”га интервью берди.
“Санъаткор бўлмаганимда сиёсатшунос бўлардим”
— Ёшлигимда уйимиз деворида дунёнинг сиёсий харитаси илиниб турарди. Қизиқишим кучли бўлгандан, деярли барча давлатларнинг жойлашуви, номи ва байроғи кўринишини эслаб қолардим. Отам савдогар бўлган, жуда талабчан эди, аммо санъатни жуда севарди. Тошкентлик санъаткорлар биз тарафларга келса уйимизда меҳмон бўлмай кетмасди. У билан харитадаги давлатларнинг номини ёддан айтиб “беллашардик”. Санъатга ҳам жуда ёшлигимдан кириб борганман, мактабдаги тадбирларда қўшиқ куйлардим. Агар санъаткор бўлмаганимда сиёсатчи бўлардим, лекин санъат, ижоқ қилиш барибир устун келган, дейди қўшиқчи.
“Шундай кунга келиб қолдикми, дея кўп ранжийман”
— Ёшларга ҳам маслаҳат, ҳам таклифим: телефонни бир четга қўйиб, китоб ўқишсин, дунёқарашини кенгайтирсин. Телекўрсатувларда салоҳиятли ёшларни кўриб ҳавас қиламан. Ўзимни кўп нарсани биладиган инсон деб ҳисоблардим, аммо ўша ёшларни кўриб, қийин саволларга ҳам жавоб бераётганини кўриб ўзимни нақадар кам нарса билишимни англадим. Лекин бундай ёшлар фақат телевидениеда эмас, ён-атрофимизда, ҳаётимизда бўлиши керак. Баъзилар ҳатто исмининг маъносини билмайди, “-ни” ва “-нинг” қўшимчасининг фарқини ажратолмайди. ОАВларда ҳам жумлалар, қўшимчалар хато ёзилганини кўриб жуда ранжийман ва шунчаликка келиб қолдикми, деб ўйланиб қоламан. Умид қиламанки, олий ўқув юртларида талабаларга бу борада янада чуқурроқ таълим берилади.
Санъат инсонга Аллоҳ тарафидан юқтирилади. Ота-оналар фарзандим Шерали Жўраев, Мутал Бурхонов, Муҳриддин Холиқов, Озодбек Назарбековга ўхшаган қўшиқчи бўлсин дея олиб келади, аммо “слух”, овоз бўлмаса ундан санъаткор чиқиши қийин. Қўшиқчиликка таланти бўлмаса болани мажбурлаш керак эмас, унда балки бошқа томондан қобилият бордир, балки шифокор бўлар, балки боксчи. Ота-она фарзандининг имкониятларини кўра билиб, уни баҳолай олиши керак, деди санъаткор.
“Комилжон Отаниёзов оддий йигитдан узр сўраб, тўйини ўтказиб берган”
— Авваллари одамлар санъаткорларга жуда ҳурмат билан қараган, уларга ҳавас қилиб, Шерали, Комилжон, Мутал (Мутаваккил), Нуриддин дея исмлар ҳам қўйган. Ҳозир эса баъзилар танилиш, қандайдир ном чиқариш учун санъаткор деган номни булғаяпти. Минг афсуски, уларнинг ичида бизнинг ҳам санъаткор деган номимиз бор. Халқнинг меҳрини қозона олишимиз керак, устоз санъаткорлар нафақат халқнинг тўйларида, балки мотам ёки оддий ҳашар вақтларида ҳам халқнинг ўғлони бўлиб улар билан ёнма-ён турган. Комилжон Отаниёзовнинг “ГАЗ” автомобили бўлган, ўша машинада кетаётиб бир йигитга бехосдан сув сачратиб юборган. Тушиб дарҳол йигитдан узр сўраб, айбини қандай ювиши ҳақида ўйлаган ва уйланганмисан деб сўраган. Йигит ҳали уйланмаганини айтгач, уйланадиган кунинг тўйга мени чақир, мен ўша сиз сув сачратган йигитман десанг эслайман, тўйингда, албатта, хизмат қилиб бераман деган. Орадан бир неча йил ўтиб йигитнинг тўйи белгиланганда, Комилжон Отаниёзовни топиб борган ва ўзини эслатган. Бўлди, ваъда-ваъда, дея Комилжон ака тўйни чиройли ўтказиб бериб, ўзига “қистирилган” пулларни ҳам ҳаммасини йиғиб, йигитга берганлар ва мени кечирдингми деганлар. Мен ўйлашимча, санъаткорлар шундай кўнглиочиқ бўлиши керак, дейди Аҳрор Усмонов.
Суҳбатни тўлиқ ҳолатда Дарё Lifestyle YouTube каналида томоша қилишингиз мумкин.
Изоҳ (0)