Кулги умрни узайтиради, у орқали чарчоқ ва муаммолар бир зумга бўлса-да унутилади. Яхши кайфият юқумли бўлади, бир инсон сабаб минглаб одамларнинг юзига табассум, қалбига илиқлик югуриши мумкин.
“Халқлар дўстлиги” санъат саройи мана неча кундир-ки юқори энергия ва “янгисини эшитиш” мақсадида келган томошабинлар билан тўла. Ўзбекистондаги энг машҳур қизиқчилардан бири, сўз устаси Аваз Охун 15—24 ноябрга қадар “Тўйдаги томоша” номли концерт дастурини ўтказиб келмоқда. “Дарё” жамоаси бу йил ҳам қизиқчининг концертидан қайноқ репортаж тайёрлади.
Аваз Охундан энг биринчи сўралган савол бу йилги концертда ким бошловчилик қилиши ҳақида бўлди. Қизиқчи бу масъулиятли вазифани сухандон Толибжон Исроиловга ишонганини айтди.
Қизиқчини қўллаб-қувватлаш учун унинг ҳамкасблари, санъат вакиллари келиб, у билан концертгача бўлган жараёнда елкама-елка турди. Ижодкорнинг ўн кунлик концертнинг ҳар бир сеансида ёнида бўладиган устози оқ фотиҳа берди.
Навбатдаги дастурда қандай мавзулар бўлиши ҳақида қизиқчи жавоб берди:
— Бу йилги концертда мактаблар мавзуси, устозларни улуғлаш, ҳозирги кунда таълимга берилаётган эътибор ҳақидаги саҳна кўринишлари бор. Авваллари биз мактабда пахта териб, далада ер чопиб ўқиган бўлсак, ҳозирги ўқувчилар ва устозлар мажбурий меҳнатга жалб қилинмайди, бу одамни хурсанд қилади, албатта. Олдинги таълим билан ҳозиргиси, ўқитувчи ва ўқувчиларга аввалги муносабат билан бугунгисини таққослаб, шуни юмор билан етказиб берамиз. Аёлни улуғлаш, оилани муқаддас деб билиш, ота-она муносабати, фарзанд тарбияси ҳақида ҳамда европача ўқисак-да, яшаш тарзимиз шарқона бўлсин дея шу мавзуларга қўл урдик. Томошабинларга ҳам маъқул бўляпти — оила мавзусидаги деярли барча ҳазиллар бор.
Концертдаги юлдузли меҳмон Улуғбек Раҳматуллаев жонли ижродаги қўшиқлари билан мухлисларни хурсанд қилиб келаётганди. Бироқ хонанданинг концерти ҳам Аваз Охунникидан бир ҳафта олдин бўлиб ўтгани, шу сабаб томоғи оғригани туфайли тадбирга келолмади. Аммо ёш, истеъдодли хонанда Суҳроб Ҳамдамов қадрдонини шошилинч вазиятда жонли ижродаги қўшиқлари билан “қутқарди”.
— Концертимдан инсонлар таъсирланиб, қайсидир ишга мотивация олишини, бирор вазиятдан хулоса чиқаришини хоҳлайман. Бир куни аёлим гўзаллик салонида бошқа аёлларнинг ўзаро суҳбатини эшитиб қолибди. Бир аёл эри билан ажримга ариза бермоқчи бўлиб юрган экан, сўнг концертимда оила ҳақидаги фикрларимни эшитиб қолиб хулоса чиқаришибди, шу оила сақланиб қолибди, дейди Аваз Охун.
“Ижодкор ўзидан кўнгли тўлмаслиги, қониқмаслиги, хотиржамликка берилмаслиги керак. Қачонки ўзидан кўнгли тўлса, ўша куни ижоддан тўхтайди. Юлдузлик касалига чалинмай, бор мақтов ва эътирофни сокин қабул қилиши лозим”, дея қизиқчи ўз фикрлари билан бўлишди.
Завққа тўлиш ва бу йилги концерт қандай ўтаётганини кўриш учун тўлиқ видеони “Дарё”нинг Lifestyle YouTube каналида томоша қилинг.
Изоҳ (0)