“Ёдгор Саъдиев сабаб онам ҳаётга қайтди” — Шаҳноза Ҳожимуродова онасининг жиддий касалликка чалингани ва устозлардан танбеҳ эшитгани ҳақида (видео)

Актриса Шаҳноза Ҳожимуродова YouTube’даги “Дарё lifestyle” каналига берган интервьюсида онасининг оғир ҳасталикка чалингани, театр жамоаси қўллаб-қувватлагани ва ижтимоий тармоқлардаги бир чиқиши учун қаттиқ танқид қилишгани ҳақида гапирди.

— Уч-тўрт йил олдин онам оғир бемор бўлиб қолди. Буни эслаш фарзанд учун жуда оғир, аммо онамнинг аҳволи шу қадар оғир эдики, у ўлим тўшагида эди. Мен иш нима бўлса бўлсин, онамга қарайман деб Хоразмга кетдим. Онам ўзини билмайдиган ҳолатда эди. Хоразмга етиб борган кунимоқ театрдан қўнғироқ бўлди. “Онам касал, уни ташлаб кетолмайман, ролларимни дублёрим ижро этиб турсин, қачон қайтишимни билмайман”, дедим. Орадан бир неча дақиқа ўтиб, раҳбаримиз, Ўзбекистон халқ артисти Ёдгор Саъдиев қўнғироқ қилди.

Аслида, мен у пайтда театр ва унинг жамоаси учун ҳеч ким эмасдим. Чунки ҳали штатга олинмаган, гонорар асосида ишлайдиган актриса эдим, холос. Раҳбарнинг “Қизим, нима бўлди? Биздан қандай ёрдам керак?” деган гапи кўнглимни тоғдек кўтарди. “Сиз бугуноқ Тошкентга қайтиб, ролингизни ижро этинг, онангизнинг соғлиғини бизга қўйиб беринг”, деди. Шу куни кечки рейс билан пойтахтга қайтдим. Эртаси куни эса тиббиёт бирлашмаси томонидан онамга касалхонага ётиши учун ордер беришмаётганди. Тўғрироғи, икки ҳафтадан кейин берамиз, деб вақтни ортга суришаётганди. Аммо онам бунча вақт кутолмасди, чунки иккила буйраги ҳам ишдан чиқиб бўлаётганди. Ордер ажратилгач, онамни аэропортда кутиб олиб, тезлик билан касалхонага ётқизишди. Онам икки кунда кўзларини очиб, ўзига келди. Онамнинг вазни қисқа фурсатда 70 килодан 45 килога тушиб қолган, ўзини билмайдиган аҳволда эди. Онам ҳалигача Ёдгор акани дуо қилади, шу инсон сабаб онамнинг саломатлиги яхшиланди. У ҳаётга қайтди. Шу боис театрни иккинчи оилам дейман, қийин вазиятларимда кўп қўллаб-қувватлашди, дейди Шаҳноза Ҳожимуродова.

Актриса баъзи вайнлари учун театр жамоасидан қаттиқ танбеҳ эшитгани ҳақида гапирди.

— Бир куни ҳамкасбим Саида Саидбекова фақат аёллар жамоасидан иборат “Зумрад ва Қиммат” номли вайнлар тўпламини суратга олишни таклиф қилди. У Қиммат, мен эса Зумрад ролини ижро этардим. Уч-тўртта вайнлар тармоқларга жойланганидан кейин устозимиз Шоҳида Исмоилова қўнғироқ қилиб, “Қизим, ҳозир Зулфияхоним фильмидаги ролингизни кўриб ўтирибман. Қандай чиройли ижро, сиздек актрисага бундай роллар ярашмайди”, деб аввал кўкка олиб чиқиб, кейин пастга туширдилар. Бундай қўштирноқ ичидаги эътирофларни жуда кўп устозлардан эшитдим. “Сиз академик драма театри актрисасисиз”, деган гапдан кейин зудлик билан вайнларда суратга тушишни тўхтатишга қарор қилдим. Буни Саида Саидбекова ҳам тўғри тушунди. Ундан кейин тарбиявий аҳамиятга эга вайнларда суратга тушдим. Бу замон талаби, шу билан бирга, тарбиявий аҳамиятга эга. Менимча, ролларим бачкана эмас, чунки вайнларнинг бирортасида бошда рўмолсиз чиқмайман, дейди актриса.

Актриса билан бўлган суҳбатни тўлиқ ҳолда томоша қилинг.