Ўзбекистон халқ артисти, хонанда Маҳмуд Намозов “Дарё” учун махсус интервью берди. Интервью давомида у ёш ва профессионал хонандаларнинг хатоси, интернетда уруш қилаётган санъаткорлар, еётган овқатини деб негатив эшитгани ҳамда президент байрамларда санъаткорларнинг шахсан ўзига нималар дейиши ҳақида гапирди.
“Ёшларнинг хатоси кечиримли, катта санъаткорларники эмас”
— Мен демократ одамман, ёш қўшиқчиларга имкон бериш керак, деб ҳисоблайман. Катта-катта санъаткорлар, профессионал қўшиқчилар фолклор жанрини бузиб айтса, хафа бўлиш мумкин, аммо ёшларники кечиримли. Улар ҳозир юртимизда куйлаб, кейин чет давлатларга чиққанда, хатоси нимада бўлаётганини англайди ва дарров тузатади.
Оддий мисол, Севара Назархон бутун дунё бўйлаб юрибди. Севара Назархон эстрада хонандасими? “Наманганнинг олмаси, анори бордурей” дея фолклордан шундай чиройли фойдаланиб, дунёни лол қолдириб юрибди. Шундай санъат, шундай оҳанг дунёга кераклигини у биляпти. Четдагилар эса бу қандай қўшиқ экан, Назархоннинг ижодимикан деб ўйлайди. Миллатнинг қўшиғи бу! Севара Назархон бундан чиройли фойдаланиб юргани ўзининг ҳам, миллатнинг ҳам ютуғи, дейди хонанда.
“Еган овқатимни интернетга жойлаганим учун негативга дуч келганман”
— Бир куни Абдурашид Йўлдошев ва бошқа санъаткорлар билан Жиззахга концерт бериш учун бордик. Бизни кутиб олган инсонлар аввал тамадди қилиб олинглар, дея яхши жойга олиб борди. Хурсанд бўлиб, елиб-югуриб хизмат қилишди, турли ноз-неъматлардан олдимизга қўйишди. Шуни Instagram’га жойлагандим. Мен Instagram’да пост жойласам, Facebook’да ҳам автоматик тарзда чиқади.
Эсимдан ҳам чиқиб кетганди, бир йигит халқ артистлари, санъаткорларгаям беш кетмайман, еган дастурхонию овқатини оммага мақтанади, шуям ишми, одам озроқ уялиши керак, дея роса ёзибди. Нима қилишни билмай аста шахсий саҳифасига ўтдим-да, саломлашиб ёздим. Кейин “Биласизми, ўша овқатларни мақтаб едигу, аслида яхши эмас экан. Жон куйдириб хизмат қилгани учун зўр деб қўйгандик-да” десам ҳалиги одам “Э, ака, бизга ҳам жавоб ёзаркансиз-ку. Доим мақтаб изоҳ қолдирсам, ҳеч жавоб қайтармайсиз, негатив ёзганимда дарҳол жавоб ёзяпсиз. Сиз билан суҳбатлашишга ҳам эришдим” дея хурсанд бўлганди. У жавоб қайтараманми, йўқми, шуни синаб кўрмоқчи бўлган экан.
Санъаткор фақат саҳнада қўшиқ айтади дегани эмас, биз ҳам инсонмиз, бир пиёла чой ичамиз, ким биландир танишамиз — шуларни эътироф қилгимиз келади-да. Қўшиқ айтишимиздан кўра шундай самимий суҳбатлар баъзиларга кўпроқ ёқади, дея кулиб эслайди Маҳмуд Намозов.
“Антиреклама ҳам реклама дейдиган санъаткорлар бор”
— Ҳозир баъзи санъаткорлар учун антиреклама ҳам реклама бўлиб қолган. Уруш-жанжалли муносабатини интернетга олиб чиқади, мен бундай нарсага мутлақ қаршиман. Нафақат санъаткорлар, балки бошқаларга ҳам тегишли бу. Агар ўзимнинг кимдадир гапим бўлса, шу одамни топиб, шахсан гаплашаман.
Ижтимоий тармоқ жуда катта майдон — уни бутун дунё кўради. Бизда нима бўлаётганини Америкадагилар, Европадагилар жуда яхши билади. Қаерда бензин йўқлигини, қаерда автоҳалокат бўлганини, “свет” ўчиб қолганини, дейди халқ артисти.
Давлат тадбирларида президент баъзи санъаткорларнинг ёнида узоқроқ суҳбатлашиб қолади, шундай пайтда юртбоши ижодкорларга нима дейди?
— Давлат раҳбарлари ҳам инсон, уларнинг ҳам ҳиссиёти бор. Давлат тадбирларида юртбошимиз билан кўришиб қолганимизда самимий салом-алик бўлган. Яхшимисан, ишларинг яхшими, соғлиғинг яхшими, деган гаплар бўлади. Президент санъатга нисбатан, бизга нисбатан самимий — кўришиб қолсак мотивация берадилар. Кузатиб бораман, яхши ишлашинг керак, дейдилар.
Тўлиқ суҳбатни Daryo Lifestyle YouTube каналида томоша қилишингиз мумкин.
Изоҳ (0)