“Қашқадарё”, “Қорақалпоғим” ҳамда ҳитмейкер Ҳамдам Собиров билан куйлаган “Кара гўзим” тароналари билан машҳурликка эришган хонанда Севинч Исмоилова 28 январь куни “Халқлар дўстлиги” санъат саройида бир кунлик концерт дастурини мухлислари эътиборига ҳавола этди. Ёш қўшиқчи Севинч Исмоилованинг концертида “Дарё” мухбири қатнашиб, хонанда, унинг яқинлари ва дуэтдошлари билан суҳбатлашди.
Хонанданинг мухлиси қанчалик кўплигини тўрт мингдан зиёд томошабинни сиғдирадиган концерт залида бирорта бўш ўриндиқ йўқлигидан билиб олиш қийин бўлмади.
Бир неча йилдан бери концерт берадиган хонандалар ҳам дастур бошланишидан аввал қаттиқ ҳаяжонланишига қарамай, эндигина иккинчи яккахон концертини бераётган Севинч яқинлари ва дўстлари билан ўзини эркин ҳис қилди. Фурсатдан фойдаланиб уни суҳбатга чорладик.
— Бу сафар ичимда озгина тинчлик бор рости, ўтган йили роса ҳаяжонда эдим. Шуни тушундимки, ҳаяжонни енгиб, хотиржам бўлсам, концерт ҳам яхши, тинч ўтади. Олдимдаги одамларга ҳам босиб бўлмайди. Ўтган йили уларнинг барчасига ҳаяжондан босим ўтказиб қўйгандим. Шунинг учун бу сафар жим турибман, дейди кулиб Севинч.
— Бу йил саҳнада, рэпертуар ва сценарийда янгиликлар талайгина. Концертимда ўзимга ҳам сюрпризлар кўп бўлди. Янги клипимни саҳнада катта экранда премера қиламиз. Ўтган йили ҳам янги қўшиқ ва клипни мухлисларимга тақдим этгандим — бу бизга ҳар йиллик анъана бўлиб боряпти. Келгуси йиллар ҳам бу анъанани чиройли давом эттириш ниятидамиз, деди у.
Концертга меҳмон сифатида Воҳиджон Исоқов, Осман Наврузов, клипмейкер Икром Али ва кўплаб хонандалар ташриф буюрди. Ҳамдам Собиров, Алишер Байниязов билан куйланган дуэтлар эса зални рақс тушишга мажбур қилди.
— Бугун концертга меҳмон сифатида келдим, дуэт бўлмаётганининг сабаби менинг концертимда ҳам дуэт кўп бўлди. Агар меникида айтсак уникида ҳам айтишимизга тўғри келиб, такрорланиш бўлиб қоларди. Иккимизнинг концертимиз ораси яқин бўлгани сабабли бир нарсага қараб қолишни хоҳламадик, насиб этса концертдан сўнг янги таронамизни тақдим этамиз.
Аввало Аллоҳдан берилган куч ва омад туфайли, бундан ташқари ўзи ҳам Севинч тинмасдан меҳнат қиляпти, халқнинг қўллаб-қувватлаши билан бирга шундай даргоҳда концерт бериш даражасига етиб келди. Севинчга келгусида 10-15 кунлаб концерт беришини тилайман, дейди Осман Наврузов.
Ҳамдам Собиров билан куйланган “Кара гўзим” қўшиғи YouTubeъда 74 миллион марта кўрилган. Бу тарона ҳар икки хонанда учун ҳам, шубҳасиз, ёрқин коллаборация бўлди. Ҳамдам Собиров Севинчни концерт билан табриклаб, саҳнада унга қип-қизил атиргуллар совға қилди.
— Концерт ажойиб атмосферада ўтмоқда. Бошқа санъаткорларга қараганда Севинч ўзининг тарбияси, ижоддаги ўзгача йўналиши билан ажралиб туради. Гаплашса ҳам самимий гаплашади, юраги тоза. Ўзига ҳам келаси йилларда 10 кунлаб концерт бериш насиб қилсин, деб айтдим. Севинчнинг концертида янги дуэт куйлашга улгурмай қолдик, Худо хоҳласа 24 майда ўзимнинг концертимда у билан дуэт бўлади, албатта, дейди у.
Концертда “кичкина табиб” Дилшодбек Каттабеков, қизиқчи Нодир “лўли”, шоумен Аҳрор Қўшматов бошловчилик қилиб, ҳар бир блок орасида томошабинларга хуш кайфият улашиб турди.
Севинч билан бир неча кун хонанда Осман Наврузовнинг концерт дастурида суҳбатлашилганда, “Бу йилги концертим бир кун бўлади, келаси йил 2-3 кун қилмоқчиман” деганини эслаб, бир кун мухлислар учун камлик қилишини айтиб, режалар ўзгаргани ҳақида сўрадик:
— Бир неча кундан буён айнан шу ҳақида гаплашяпмиз, насиб қилса, келаси йил 2-3 кун концерт бермоқчиман. Устоз санъаткорлар билан ҳам дуэт куйлаш фикри бор, аммо ўзимнинг бобом ҳам катта санъаткор, хонанда эдилар. Устоз санъаткорларнинг кўпи раҳматли бобомни яхши танийди. Концертимда бобомни кўриш менга армон бўлиб қолди.
Севинч Исмоиловадан мухлислар, асосан, севги-муҳаббат ҳақидаги ва шўх тароналар эшитиб ўрганган. Аммо хонанда юки бор, оғирроқ мавзуларда ҳам куйлайдими? Бу саволга Севинчнинг ўзи шундай жавоб берди:
— “Омад” номли қўшиғимни бугун премера қиламиз, шу ва шунга яқин воқеалар 99 фоиз инсоннинг бошида ўтган, деёламан. Ўзимнинг ҳам ҳаётимда бундай воқеалар кўп бўлган. Клип тайёр бўлгач, яқинларимга кўрсатганимда кўпчилик кўзига ёш олиб, ҳаётим эсимга тушди, деди.
Концертдан репортажни тўлиқ ҳолда Дарё Lifestyle YouTube каналида томоша қилинг.
Изоҳ (0)