Тҳе cовер уп лойиҳасида танилган, “Яхши кўрардим”, “Жанона”, “Ёр” қўшиқлари билан тингловчилар қалбидан жой олиб келаётган ёш ижодкор Ғайбулла Турсунов “Халқлар дўстлиги” санъат саройида икки кунлик илк яккахон концерт дастурини мухлислари эътиборига ҳавола қиляпти.
Хонанданинг илк концерти бўлишига қарамасдан у тўрт мингдан зиёд томошабин қаршисида тўлиқ жонли ижрода куйлади. Саҳна орти ва дастурнинг энг қайноқ лавҳаларини “Дарё” ўз камерасига муҳрлади.
Санъаткорнинг дўстлари, ижоддаги ҳамкорлари, қўшиқчилар ва оила аъзолари концерт олдидан унга илиқ тилаклар билдирди. Концерт икки блокдан иборат бўлиб, жами 19 та қўшиқ куйланди. “Йилнинг энг яхши аёл хонандаси” номинациясини олган ижодкор Жасмин билан “Дил” таронаси куйланди. Жасмин саҳнада Ғайбулла Турсуновнинг илк концерти билан табриклаб, ўзи ҳам келаси йилда концерт бермоқчилигини айтди.
Ғайбулла ака билан кўп тадбир ва концертларда бирга куйлаганмиз, иккимизга ҳам жонли куйлаш қийин эмас, қайтанга бизга жонли ижро ёқади, дейди Жасмин. Янги дуэт куйламоқчи эдик, аммо концерт тайёргарлиги билан улгурмадик. Шунинг учун ўзимнинг рэпертуаримдан “Кумуш ноласи” қўшиғимни куйлаб бераман.
Авваллари шўх-шодон қўшиқлар куйлаган, сўнгги пайтларда жиддий мавзулардаги қўшиқлари кўпайганининг сабаби сўралганда хонанда шундай жавоб берди:
Ижодкор бир хил йўналишда тўхтаб қолмаслиги керак, деб ҳисоблайман. Жиддий мавзуларда ҳам, кимларгадир “тегадиган” мавзуларда ҳам ва албатта, халқбоп қўшиқлар ҳам куйлайман. Фақат битта мавзуда қўшиқ айтиш керак эмас, менимча.
Концертга яқинда келин бўлган Афруза турмуш ўртоғи билан, Муштарий Зафар, блогер ва қўшиқчи Азода, Дилшод Назаров келиб хонандани дебют концерти билан табриклади.
Дастур барча севган “Яхши кўрардим” қўшиғи билан бошланди. Энг “бомба” бўлган чиқиш Жаҳонгир Отажонов билан куйланган дуэт премьераси бўлди. Ёш санъаткорнинг устози ўз рэпертуаридан энг рақсбоп қўшиқларини куйлаб, зални “оёққа турғазди”.
Ғайбулла Турсунов концерт сўнгида барча кутган “Жанона”ни мухлислари билан биргаликда куйлади, улар билан суратга тушиб, ўзи ҳам “ёнди”, зални ҳам “ёндирди”. Ҳаттоки, дастур тугаб, пардалар туширилгандан сўнг ҳам қўлидан микрофонини қўймай, “Жанона”сини куйлаб турди.
Эмоциялар ичидаги, концерт берганига ўзи ҳам ишонмаган хонанда ўз таассуротлари ҳақида журналистларга тўлиб-тошиб гапириб берди.
Халқ хизматлари, тадбирларда доим жонли куйлайман, шу сабабли концертим ҳам тўлиқ жонли бўлишини хоҳладим. Минглаб инсонлар олдида жонли айтиш сал қийинроқ бўларкан-у, аммо доим жонли ижро тарафдориман. Биринчи кунда барча паст-баландни кўриб олдим, қўшиқ сўзларида бир оз адашиб ҳам кетдим, техник ва ҳаяжонланганда бўладиган хатоларни эртага қилмайман, деб умид қиламан.
Мен ижрочиман, сўзга уста эмасман. Шу сабабли ҳам томошабинлар мулоқот бир оз камроқ бўлиб қолди. Жонли ижродаги концертда хоҳласангиз ҳам, хоҳламасангиз ҳам барибир импровизация, дастурдан четга чиқиш ҳолатлари бўларкан. Сценарий қолиб, саҳнада бошқа кутилмаган ҳолатлар бўлиб кетди. Томошабинлар орасидан бир қиз чиқиб рақсга тушиб бериши керак эди, лекин умуман бошқа қиз чиқиб олди, шокка тушиб қолдим (кулиб).
Концерт бошланишидан беш дақиқа олдин қаттиқ тайёргарликлар таъсири ва кучли ҳаяжондан овозим йўқолиб қўлди. Шифокорлар чақириб, тинчлантирувчи уколлар олиб саҳнага чиқдим.
Жаҳонгир Отажонов, устозим билан дуэт таклифи у кишидан чиқди. Ватан ҳақида қўшиғинг йўқ экан, менда бор, бераман дедилар ва шу билан дуэт куйладик. Бундан кейин ҳам ижодий ҳамкорликлар тўхтамайди.
Аслида ўнта ҳит тарона чиқарганимдан сўнггина концерт бераман, деб ният қилгандим. Лекин жамоам билан гапдан гап чиқиб ҳазиллашиб концерт бермаймизми, деган гапимни ушлаб олишди шу билан қолгани тезлашиб кетти. Бир кун аввал ҳам концертим бўлишига ишонмагандим, ҳозир сиз билан гаплашиб туриб энди ҳис қиляпман. Ҳаттоки, зал тўлишига ишонмагандим, ўзимнинг яқинларим, танишларим билан 200 тача одам билан концерт ўтказсам керак, деётгандим.
“Наргиз”, “Кўча” қўшиқларимни аввал қатнашган лойиҳаларимда куйлаганимдаёқ мухлисларга ёққанди. Премьера қўшиқларим ҳам қалблардан жой олиб, ҳит даражасига кўтарилади, деб умид қиламан. Насиб қилса, келаси йил уч кун концерт бермоқчиман” дейди ёш хонанда.
Концерт репортажини тўлиқ ҳолатда Дарё Lifestyle YouTube каналида томоша қилишингиз мумкин.
Изоҳ (0)