“Арзанда жоним” қўшиғи билан мухлислар эътиборига тушган хонанда Сурайё Қосимова YouTube’даги Daryo Lifestyle каналига берган интервьюсида ижодидаги танаффус сабаблари, руҳий тушкунликка тушгани ва онасининг бевақт ўлими ҳақида гапирди.
“Фарзандларимни бировга ишонмадим”
— Уч йил оралиғида кетма-кет фарзандли бўлдим. Уларни бировга ишонмай, ўзим катта қилишга қарор қилдим. Аёл санъаткорга жуда қийин экан, оилани танлагандан кейин ижодда барибир узилиш бўларкан. Фарзандларим улғайиб, ўзини эплай олганидан кейин яна бор эътиборимни санъатга қаратдим. Аслида менда ижодий узилиш бўлгани йўқ, қўшиқлар яратдим. Фақатгина уларни оммага тақдим этмадим, бунинг ўзига хос сабаблари жуда кўп.
Ҳозир қизим 15, ўғлим эса 12 ёшда. Қизим расм чизишга қизиқади. Ўғлим эса қизиқишлари борасида аниқ қарорга келгани йўқ. Аммо иккисининг ҳам санъаткор бўлишини истамайман, уларнинг ўзида ҳам хоҳиш йўқ. “Санъаткор бўлсак, сиздек қийналиб, гастролларда юрамизми?”, дейишади. Айтганча, бу орада ўқишга ҳам кирдим. Юнус Ражабий номидаги Мақом миллий мусиқа институтининг анъанавий хонандалик бўйича магистратура босқичида таҳсил оляпман. Насиб қилса, бу йил ўқишни тамомлайман. Олдинда мени илмий изланишлар, давлат имтиҳонлари ва диплом ҳимояси кутиб турибди, дейди Сурайё Қосимова.
Хонанда руҳий тушкунликка тушгани ва негатив фикрлардан узоқ юришга ҳаракат қилиши ҳақида гапирди.
— Кўп марта санъатдан кетаман, дедим. Чунки санъат узун зинадан иборат. Қанча ижод қилсангиз ҳам унинг поғоналари тугамайди. Чарчадим деган ижодкор давом этолмай қолади. Аёл кишига жуда қийин экан. “Бўлди, санъатдан кетаман. АҚШга кетаман”, деб бир неча бор қарор қилдим. Аммо санъат ҳам ўзининг одамини қўйиб юбормас экан. Кучли депрессияга ҳам тушдим, ҳаммаси тамом деган вақтларим ҳам кўп бўлди. Ўша вазиятларда атрофимдаги инсонлар мотивация бериб, ижод қилишга ундашади.
Шу кунгача яккахон концерт беришни орзу қилардим. Октябрь ойида концерт қилишимни таклиф қилишди. Тўғри, концерт борасидаги барча орзуларимга эришолганим йўқ, аммо мухлислар соғинчини ва меҳрини ҳис қилдим. Бу ҳам менга катта куч бағишлади. Ҳамиша ўзимдан камчилик излайман, ижодимдан ҳеч кўнглим тўлмайди. Менимча, шу ҳам депрессияга сабаб бўлса керак, дейди Сурайё Қосимова.
Хонанда онасидан айрилгач, улғайганини ҳис қилгани ҳақида гапирди.
— Онамдан айрилган кун улғайганимни ҳис қилдим. Онам қандли диабет касаллиги билан оғрирди, ёз чилласида комага тушиб қолди. 10 кун ҳушсиз ётган бўлса, “Йўқ, аям тузалади”, деб ишондим. Илгари “Мен бахтли бўлсам, онамнинг кўнгли тўқ бўлади”, деб ўйларканман. Ўйлаб қарасам, мен ҳамиша идеал бўлишга, уй-рўзғор ишларини уддалаш ва болаларимга меҳрибон она бўлишга ҳаракат қилибман. Аммо Сурайё Қосимова бўлиб шаклланишимга катта ҳисса қўшган инсонларга эътибор бермабман. Онам комага тушгандан кейин ёнида кўп бўлишга ҳаракат қилдим, аммо ўшанда кўп нарсага кечикканимни англадим.
3 июль туғилган куним, бир кун аввал кўргани келганимда “Туғилган кунингни Фарғонада ўтказиб, кейин бир ҳафта ёнимда бўлгин”, деди. Аммо мен ношудлик қилиб, гапларидан ҳеч нарсани англамабман. Ҳар йили ёзда болаларим қишлоққа онамнинг ёнига боришарди. Аммо ўша йили онам “Бу йил кучим йўқ, хафа бўлма, болаларингга қаролмайман”, деди. Мен ақлсиз бола сингари онамнинг нега бундай деётганини, аслида бу гапи билан болаларни ўзидан узишга интилаётганини ҳам пайқамабман, дейди Сурайё Қосимова.
Суҳбатни тўлиқ ҳолда қуйидаги ҳавола орқали томоша қилишингиз мумкин.
Изоҳ (0)