“Кастинглардан кўнглим қолган”. Мафтуна Ҳусниддинова болаликдан пул топишга мажбур бўлгани ва “Митти вайн” жамоасига таклиф этилиши ҳақида (видео)

Бугунги кунда ижод оламидаги жанрлар ва қарашлар бир мунча ўзгарди. Ижтимоий тармоқлар ривожлангач, қисқа видеоларни суратга олиш анчайин урфга айланди. Instagram’да салкам ярим миллион обуначига эга вайнер YouTube’даги “Daryo lifestyle” каналига берган интервьюсида кузатувчиларни қизиқтирадиган кўплаб саволларга жавоб берди.

“Санъаткор бўлишимга қарши бўлишган”

— Дадам сомсапаз, онам эса уй бекаси. Буни айтишдан ҳеч қачон уялмаганман. Чунки улар ҳалол меҳнат қилиб, қийинчиликлар билан бизни вояга етказишди. Оилада тўнғич фарзанд бўлганим учун ука, синглимга қараганда ота-онамнинг қийин кунларига кўпроқ гувоҳ бўлганман. Болаликдан санъатга қизиқишим юқори бўлган, вокал дарсларига қатнаганман. Аммо актриса бўлиш ниятим қатъийлашганида кўпчилик қариндошларимиз қарши бўлишган. Ўша вақтда кўпроқ мени онам қўллаб-қувватлаган. Эстрада цирк коллежига ўқишга кириб, цирк артисти йўналишида таҳсил олдим. Аммо коллежни тамомлаб, институтга кириш ниятим бўлмади. Бунинг ўзига хос сабаблари бор.

“Эрта ишлашга мажбур бўлганман”

— Оддий, камтарин оилада вояга етганман. 15-16 ёш бўлганимда кўп молиявий қийинчиликларга учраганмиз. Чунки кетма-кет улғайган учта болани боқиш ва ўқитиш ёлғиз рўзғор тебратадиган дадамга оғир эди. Шу боис бир оз ёрдамлашганман. Аммо бегона жойда, нотаниш инсонлар билан ишламасдим. Атрофимдаги инсонларнинг ҳаммаси таниш бўлгани учун ота-онам ишлашимга қарши бўлишмаган. Қаҳвахонада официантлик қилганман, кейин савдо соҳасида ишлаганман, ундан кейин аёллар стилистига шогирдликка тушганман.

Дўконларга ширинлик тарқатадиган фирмага савдо агенти бўлиб ишга кирганман. Дўконлар билан гаплашиб, маҳсулотимизни харид қилишга кўндиришимиз керак эди. Ҳар куни бир неча чақирим пиёда юрардим ва йўлимда учраган дўконга кириб “Маҳсулотимизни олинг”, деб илтимос қилардим. Ҳеч эсимдан чиқмайди, йўлда кетаётганимда этигим йиртилиб кетган. Энг алам қилгани — бола бўлганим учун ҳеч нарсани тушунмаганман. Улар сотилмай қолган маҳсулотларнинг пулини ойлигимиздан босиб қолишган.

“Кастинглардан кўнглим қолган”

— Аслида, хонанда бўлиш ниятим бўлмаган, аммо бир муддат тўйларда қўшиқ айтганман. Бек вокал хонандаси бўлиб тўйларга чиқардим. Журналист ёки актриса бўлишни орзу қилганман. Жуда кўп кастингларда иштирок этганман, телеканалларга бориб, иш сўраганман. Аммо ҳар доим “Ўзимиз қўнғироқ қиламиз”, деб қайта алоқага чиқишмасди. Бир нечта сериалларга чиққанман, аммо ҳеч қандай наф бўлмаган. Яъни ўзимни актриса сифатида кўрсатолмаганман. Энг ёмони, менга гонорар тугул, йўл пулини ҳам беришмасди. Кейин тўйларда тажриба орттириб, бошловчи сифатида иштирок этишни бошладим. Ҳозир ҳам кастинг дейишса, ўша воқеалар кўз олдимдан ўтади. Кастинглардан кўнглим қолган.

“Мен жамоага содиқман”

— “Митти вайн” жамоаси аъзолари мени Instagram’да кузатиб боришар экан, ўзлари алоқага чиқиб таклиф этишган. Битта вайн Instagram’га жойлангач, жуда кўп жамоалардан таклифлар ёғилган. Улар орасида жуда машҳурлари ва яхши гонорар таклиф этганлари ҳам бўлди. Аммо табиатан жуда содиқ инсонман, у жамоадан бунисига ўтишни истамайман. Шу боис барчаларини рад этганман.

Ўтган йили Янги йил байрами учун тўйдан қочган келин мавзусида вайн суратга олганмиз. Бир сутка давомида суратга олинган. Унинг баъзи эпизодлари Амирсой тоғ зонасида олиниши керак эди. Табиатан совуқни ёқтирмайман, тезда тобим қочиб қолади. Қаҳратон қиш куни бир сутка давомида ишлашимизга тўғри келган. Энг ёмони, машиналар музда юролмай, ўчиб қолган.

“Instagram’ни йўқотиш мен учун фожеа”

— Биламан, Instagram ҳам қачондир эскириши, аввалгидек актуал бўлмай қолиши мумкин. Аммо уни йўқотиш мен учун фожеа. Чунки обуначиларим оиламнинг бир бўлагига айланиб қолишган. Улардан ҳеч нарсани яширмайман, маслаҳатлашаман, керак пайтим дардимни айтиб енгиллашаман. Ишонасизми, яқинда бўйин соҳамдан кичик жарроҳлик амалиётини бошдан кечирдим. Улар худди яқинига қайғургандек мендан хавотир олишди.