Стендап комик, юморист Миршакар Файзуллоев яқин кунларда катта синов олдида турибди. У 12 мингдан зиёд мухлисни сиғдира оладиган Humo Arena муз саройида “Чемпион” номли стендап концерт дастурини тақдим этади. Юморист “Дарё”га берган интервьюсида концерт тайёргарлиги, ўз соҳасидан нон тополмай қўшиқ айтаётгани ҳақидаги миш-мишлар ва шифокор бўлиш орзусидан нега кечгани ҳақида гапирди.
Чипталар нима учун қиммат?
— Очиғини айтиш керак, чипталар қиммат эмас. Доим биринчи қатор мисол қилиб олинади-да, нега бунча қиммат, дейилади. Биринчи қаторнинг нархи нега бунча қиммат, дейдиган одам учун қиммат эмас. Лекин сизнинг пулингизга яраша жойлар ҳам бор — ҳамма жойда бир хил овоз ва кўриниш таъминланади. Ҳар бир лойиҳанинг умумий нархи бўлади, бозор нархи шундан келиб чиқади. Ундан ташқари, маълум вақтда бирор нарсага шароитингиз бўлмаслиги нормал ҳолат. Бир сафар бўлмаса, кейингисида ўхшайди, албатта. Яна алоҳида ҳолатларда промокодлар берилади, масалан, “Саҳна” стендап клубига келиб турган томошабинлар чегирма билан харид қилиши мумкин. “Алпомиш”даги концертда талабалар учун чегирма берилганди, дейди юморист.
Концертга кириш кимлар учун текин? Миршакарнинг энг катта орзуларидан бири концертда кимни кўриш?
— Исмимни раҳматли бобом қўйган. У киши адабиётшунос бўлган, 11 фарзанднинг отаси эди. Бобом кўп адиб ва шоирларнинг исмини бизга қўйган — буни беркитадиган жойи йўқ. Шоир Мирсаид Миршакар сабабли менга Миршакар, акамга Мирсаид деб исм қўйилган. Бошқа оила аъзоларимга ҳам адибларнинг исми қўйилган, масалан, дадамнинг исми Шуҳрат, Алишер ва Бобур эса амакиларимнинг исми. Аммаларимда ҳам шундай. Айтганча, “Чемпион” концертимда Миршакар исмли барчага кириш текин, менга ёзишсин, улар учун алоҳида жой тайёрланган. Бу жойлар ҳатто сотувда йўқ. Тахминим бўйича, Ўзбекистонда мингга яқин Миршакар исмли эркаклар бор. Бир неча йил аввал дастурчи бўлиб ишлаб юрганимда 18 ёшдан катта 650 дан ортиқ Миршакар аниқ бор эди. Исмимни айтсам иккинчи марта “Миршакар?” дея қайта сўрашади. Баъзилар билан танишганимда эса исмимни тўрт марта айтишга мажбур бўламан. Ҳаётда кимнидир адаш деб чақиришни орзу қиламан. Умид қиламанки, концертимда бу орзум амалга ошади — кимгадир адаш дейман. Миршакарлар, келинглар, ҳаммамиз йиғилишимиз керак, гуруҳ очиб, чойхона қилиб турамиз (кулиб), дейди Миршакар Файзуллоев.
“Стендапдан нон тополмай, энди қўшиқчиликка ўтдими?”
Мухлислар орасида муҳокамаларга сабаб бўлаётган яна бир ҳолат — Миршакар Файзуллоев концертида қўшиқ айтаётгани. Айрим мухлислар “Миршакар ҳам айнибди” деган фикрда. Хўш, юмористнинг ўзи бу гап-сўзларга нима дейди?
— Стендапдан нон топишим зўр, нолимайман. Қўшиқ нега керак эди? Баъзи фикрларни қўшиқда етказиш осонроқ. Сабаби у фикрларни тўлиқ тушуниш учун концертни бир-бир ярим соат давомида узмай кўриш керак. Концерт видеоси чиққанда доим бир ўтиришда кўринглар, бўлиб-бўлиб кўрган бўлсангиз ҳам, бошқатдан тўхтатмай кўриб қўйинг, бошқача таъсир қилади, деб кўп айтаман. Қўшиқ уч дақиқа давом этади, уни бир ўзим куйлаётганим йўқ. Жуда истеъдодли мусиқачилар бор, халқаро даражада ишлайдиган инсонлар билан қилинаётган ижод намунаси. Бирортасининг мақсади гонорар эмас. Менинг мақсадим — ўйланган ғояни исталган кўринишда етказиб бериш, у хоҳ қўшиқ бўлсин, хоҳ стендап, аҳамияти йўқ. Ижодкор сифатида биргина ниятим — мен қўл урган мавзу кўпроқ одамга етиб борсин, деди стендап комик.
Миршакар Файзуллоев бир вақтлар юрист, актёр, қўшиқчи бўлишни орзу қилгани ҳақида кўп бора айтиб ўтган. Лекин санъатни орзу қилган йигит нега дастурчи бўлиб кетган?
— Бир пайтлар юрист бўламан, деган гап мода эди. Лекин ҳеч қачон жиддий тарзда юрист бўлиш ҳақида ўйлаб кўрмаганман. Аммо ҳаётда шундай давр бўладики, ким бўласан, деб сўрашганда тинчгина, эл қатори юрист бўламан, деб қўйиш осонроқ. Шифокор ҳам бўлиш ниятим бўлган, бу учун ҳатто биологияни чуқур ўрганганман ҳам. Актёрликка ҳам қизиқиш мактаб давридан бўлган, аммо бу тадбирлардаги кичик роллар билангина чекланган, холос. Оиламизда ким бўлишингдан қатъи назар, энг зўри бўлишинг керак, косибчилик қилсанг ҳам, энг яхшиси бўлсанг, тирикчилигинг ҳам зўр бўлади, мижозинг ҳам кўп бўлади, дейишарди. Эрталаб ишга кетаётганингда хурсанд бўлиб кетсанг ва хурсанд бўлиб ишдан қайтсанг, демак, ҳаётда сен ютдинг, дейди юморист.
Видеони тўлиқ ҳолда “Дарё” Lifestyle YouTube каналида томоша қилишингиз мумкин.
Изоҳ (0)