Афсонавий “Сетора” гуруҳи 20 йиллик ижодий танаффусдан сўнг яна “Халқлар дўстлиги” саройи саҳнасида тўлиқ таркибда концерт дастурини соғинган мухлислари учун тақдим этиб келяпти. Декабрнинг илк уч кунида бўлиши режалаштирилган концерт беш сеансда ўтмоқда — кундузги ва кечки сеанс. “Сетора”ни соғинган мухлислар армияси учун аслида беш сеанслик концерт ҳам кам. “Дарё” мухбири шов-шувли концертда иштирок этди, унутилмас лаҳзаларни камерага муҳрлаб, хонандаларнинг ўзига микрофон тутди.
Аввало эътиборимизни тортгани, концертга ташриф буюрган мухлисларнинг деярли барчаси ўрта ёш ва катта авлод вакиллари.
Концерт “Сетора”нинг “Аждодлар” қўшиғи фонида жонли тарихий жанг саҳнаси кўриниши билан бошланди. Кейинги чиқишда актёрлар Теша Мўминов, Муқаддас Холиқова “Бибихоним” қўшиғи садосида ёрқин саҳна кўринишида рол ўйнади.
Концерт юлдузли дақиқаларга бой ўтди. Актриса Асал Шодиева “Алла” қўшиғида қўлида чақалоқ билан саҳнага чиқиб, бешик тебратди.
Блогер, қўшиқчи, телебошловчи Ҳуснора Шодиева “келин янгалар” Феруза ва Лайло ҳамроҳлигида “Ёр-ёр” қўшиғи садолари билан зал ўртасидан чиқиб келди ва томошабинлардан келин саломини аямади.
“Миллион” жамоаси аъзоси Маъруф Носиров ва Ҳусноранинг ёш келин-куёв ролидаги “ширин тортишуви” залда йиғилганларнинг тўхтовсиз қарсагига сабаб бўлди.
“Саҳар” ва “Сетора” узоқ муддатга ижоддан узоқда бўлган бўлса-да, ўз мухлисларига эга гуруҳлардан. “Саҳар” солисти Анвар Жўраев билан дуэт куйланди ва у “Сетора” қизларини ҳурмат қилишини, уларнинг самимийлигини қадрлашини айтиб, ижодий ишларига омад тилади.
Жами уч блокдан иборат концерт атмосферасини сўз билан тасвирлаш бир оз қийин — саҳна декорациялари, чироқлар, раққосларнинг ноодатий рақслари ва ёрқин образлар, энг асосийси, энергияга бой, севимли гуруҳи билан жўровоз бўлиб куйлаётган ашаддий мухлислар. Буларнинг бари тадбирга ўзгача нафас бағишлади. Қўшиқларнинг барчаси янги талқинда ижро этилди.
“Йилнинг энг шов-шувли концерти” номинацияси мукофоти истеъдодли Лолага тақдим этилганди. Албатта, октябрь ойигача бўлган концертлар ичида Лола Юлдашеваники энг ноодатий ва ёрқин лаҳзаларга бой ўтди. Бироқ афсонавий гуруҳнинг концерти бу мукофотга кўпроқ муносиб эканини гуруҳ қизлари илк чиқишнинг ўзидаёқ исботлаб қўйди.
“Концертдаги ҳиссиётлар ўзгача бўлди — саҳнага илк бор чиққандек ҳаяжонландик, аммо кейинги чиқишларимизда барчаси ўтиб кетди”, дейди Феруза Латипова.
“Мухлисларга ёқиши учун концертнинг уч блокида уч хил, бир-бирига ўхшамаган образларда намоён бўлишни хоҳлагандик ва энг зўр дизайнерлар ёрдамида буни уддаладик. Биринчи образ — тарихий, иккинчиси — миллий, учинчиси — диско, яъни ёрқин услуб”, деди Лайло Галиева.
“ Концерт мўжизавий ўтди — келган барча мухлисларимизга раҳмат, — деди Комила Хўжаева. Яна концерт қўйиш борасида ҳали бир нима дейишга эрта. Аниқ бўлмай туриб яна концерт қўямиз деб алдай олмаймиз, бундан қилиш мумкин эмас. Аввал яхшилаб тайёргарлик кўриб сўнг эълон қиламиз. Бу сўнгги концерт экан деган гап сўзларга эътибор берманг, бу нотўғри. Биз ҳақимизда жуда кўп гаплар гапирилган (кулиб). Асосийси биз буни уддаладик!”
Эмоцияга бой ўтган концертни қуйидаги ҳавола орқали тўлиқ ҳолда Дарё Lifestyle YouTube каналида томоша қилинг.
Комила Қаландарова тайёрлади.
Изоҳ (0)