Юракка яқин нолалари, ўзига хос овози ва йўналишига эга бўлган хонанда Сардор Мамадалиев 1—5 ноябрь кунлари “Халқлар дўстлиги” санъат саройида “Сардори менман” номли беш кунлик концерт дастури бўлиб ўтмоқда. “Кўнглимда бир ёр”, “Йиғлатма”, “Ажралишдик” каби қўшиқлари ҳит даражасига чиққан хонанданинг концерт дастурини “Дарё”да томоша қилинг.
Концертда қизиқчи Элмурод Ҳақназаров бошловчилик қилиб, ҳазиллари билан мухлислар кайфиятини кўтариб турди. Уч блокдан иборат бўлган кечада 21 та қўшиқ куйланди. Концертнинг биринчи қисмида хонанда отаси ҳақида гапириб, шу кунга етишига падарининг дуолари сабаблигини айтди. Вафот этган онаси ҳақида куйлаганда санъаткорнинг ўзи ҳам йиғлади, залдагиларни ҳам йиғлатди.
— “Биринчи марта тўлиқ жонли ижрода концерт беришим, лекин қийинчилик сезмадим”, дейди Сардор Мамадалиев. “Аввалги концертларимда 40-50 фоиз жонли айтардим-у, тўлиқ эмас. 100 фоиз жонли ижронинг ўзига яраша завқи бўларкан, мухлислардан энергия оласиз ва уларга янада кўпроғини бера оласиз. Кеча саҳнада турганимда бир хаёл келди — бугун 11-концертим бўлса, нега шу кунгача жонли куйламаганман, дедим ўзимга. Бундан кейин фонограмма орқали концерт қўймоқчи эмасман!”
“Бу йилги концертда дуэт бўлмайди, сабаби кўнглимдагидек дуэт яратолмадик. Шогирдим Достон Эргашев билан дуэт куйлагандим, Севинч Мўминова билан ҳам қўшиқ айтдим, лекин қачон мен ўйлаган даражадаги дуэт чиқсагина концертда ижро этамиз. Достон фақат жонли куйлайди, Севинчда ҳам жонли ижрода муаммо йўқ. Уларнинг ҳам ҳар куни хизмати бор, иккиси ҳам харидори кўп санъаткор, шунинг учун беш кун давомида концертда ушлаб туролмаймиз”.
Хонанданинг санъатга қизиқиши бўлган саккиз ёшли ўғли Темурбек “Қоши қаролар” қўшиғидан парчани жонли куйлаб берди.
— “Концертда 6-7 та қўшиқ премьераси бўлади, қолгани одамларнинг қулоғига таниш ўша барча билган қўшиқлар — “Йиғлатма”, “Кўнглимда бир ёр”, “Ажралишдик”, “Ёр керак менга”, “Қоши қаролар”. Бу қўшиқларни бутун залдагилар менга жўр бўлиб куйлади. Мухлислар маза қилиши учун кўпроқ ҳамма билган қўшиқларни танлашга қарор қилдик”.
“Ўн йил танаффуссиз концерт қўйдим, буёғига ҳар икки йилда бир қўймоқчиман. Сабаби ёшга ҳам боғлиқ, ёшликда одам чарчамайди, концертга яхшигина куч сарфланади”, дейди хонанда.
Сардор Мамадалиев эл ардоғида бўлган бир қатор марҳум устоз санъаткорлар ва халқ ҳурмат қилган инсонлар — Ҳожибой Тожибоев, Руслан Шарипов, Абдураим Абдуваҳобов, Мурод Ражабов, Фатҳулла Масъудов, шоирлар Абдулла Орипов, Муҳаммад Юсуф, спортчи Мурод Хонтўраев ҳамда Фарҳод Манноповларнинг сурати акс этган видеони катта экранда кўрсатиб, “Унутмоқ осонмас сизларни” қўшиғини куйлади.
Рэпертуарингизда шўх, рақсбоп қўшиқларга қараганда, дардли куйлар нисбатан кўпроқ. Бунинг ўзига хос сабаби борми ёки характерингизга боғлиқми, деган саволга хонанда қуйидагича жавоб берди:
— “Мен ҳеч қачон тўй учун ёки бошқа бирор мақсадни кўзлаб қўшиқ ёзмаганман. Қўшиқларимни ўзим басталайман, юрагим нимани буюрса шуни куйлайман. Бизда кўпчилик тўй учун ижод қилади-ку, мен ундай эмасман. Санъатга бизнесга қарагандек қарамайман — илҳом келмаса 2-3 йиллаб ҳам ашула чиқармайман”.
Кун келиб ҳозир оммалашган ретро услубида ҳам қўшиқ куйлашингиз мумкинми деган саволга эса шундай дея жавоб берди:
— “Бўлиши мумкин, юрак нима деса шуни қиладиган санъаткорман. Менга қолса рок қўшиқлар айтгим келади. Аввалги концертнинг бир блокини рокка бағишладим, лекин ҳеч ким тушунмади. Томиримизда Шарқ қони оқаётгани учун ҳам кўпроқ шарқона қўшиқларга эътиборимни қаратганман. Қўшиқларимнинг 99 фоизини ўзим басталайман”.
“Концертдан кейин бутун республика бўйлаб гастрол сафарларига ҳам чиқиш режамизда бор. Вилоятдаги мухлисларимизни ҳам шу программа билан кўнглини оламиз”, дейди хонанда.
Репортажни тўлиқ ҳолда Daryo Lifestyle каналида томоша қилинг.
Изоҳ (0)