Hindistonda yetti oy ichida turli shtatlarda yashovchi 25 nafar erkakka turmushga chiqqan 23 yoshli kelin firibgarlik bo‘yicha gumonlanib, hibsga olindi. Bu haqda The Economic Times xabar bermoqda.
Anuradha Pasvan ismli bu ayol “Qochqin kelin” laqabini olgan bo‘lib, u bir nechta shaxslardan iborat jinoiy guruhining a’zosi bo‘lgan. Kelinning hayoti odatda quyidagicha o‘tgan: u ishonuvchan va hech narsadan bexabar erkaklarga turmushga chiqib, bir necha kundan so‘ng ularning pullari, qimmatbaho taqinchoqlari va elektron buyumlari o‘g‘irlab, g‘oyib bo‘lgan.
Dastlabki ma’lumotlarga ko‘ra, Anuradha Pasvan avvalgi eri bilan maishiy janjallar sababli ajrashgan, keyin boshqa shaharga ko‘chib o‘tib, jinoyatchilik guruhiga qo‘shilgan. U WhatsApp kabi platformalar orqali ish yuritadigan agentliklar orqali harakat qilgan. Bunday agentliklar kelin izlab topish bilan shug‘ullanadi.
Ko‘plab firibgarliklarga aloqador bo‘lgan ayolni qo‘lga olish uchun politsiyachilardan biri yashirincha navbatdagi kuyov rolini o‘ynagan. Operatsiya davomida undan shubhalangan agentlardan biri ayolning fotosuratini mahkamaga borib, ko‘rsatgan, politsiya esa vaziyatdan foydalanib, uni qo‘lga olgan.
Mazkur firibgarlik sxemasi 3-may kuni Vishnu Sharma ismli fuqaroning arizasidan so‘ng fosh etildi. Uning so‘zlariga ko‘ra, Pasvan va Sharma 20-aprel kuni turmush qurishgan, biroq 2-may kuni kelin unga tegishli qimmatbaho buyumlarni olib, uydan chiqib ketgan.
Ma’lum bo‘lishicha, firibgarlikka qo‘l urishidan avval Anuradhu Pasvan Hindistonning Uttar-Pradesh shtatidagi kasalxonada ishlagan. Politsiya bu ish bo‘yicha Pasvandan tashqari yana bir nechta jinoyatchilarning shaxsini aniqlagan. Firibgarlikda ishtirok etganlikda gumon qilinayotgan guruh a’zolari Bxopal shahrining turli hududlarida yashagan. Bugungi kunda tergov harakatlari davom etmoqda.
Izoh (0)