Ноябрь ойининг илк кунида “Humo Arena” муз саройида Шоҳрух рэпернинг “Бу сафар бошқача бўлади” номли концерти бўлиб ўтди. “Дарё” жамоаси жонли ижродаги концерт дастурида иштирок этиб, ҳақиқий атмосферани ҳис қилишга имкон яратадиган репортаж тайёрлади.
Шоҳрух концерт давомида янги композициялари билан бир қаторда машҳур хитларини ҳам ижро этгани томошабинларга ёқимли хотиралар улашди. Айниқса, “Баландда”, “Хаёлимдасан”, “Болалигим” қўшиқларида мухлислар Шоҳрухга жўр бўлди. Кўтаринки кайфият, ажойиб муҳит, юқори энергия томошабинларни бутун концерт давомида ўраб олди. Бир неча ой олдиндан олинган чипталар чинакам мухлислар йиғилганининг исботи бўлди.
Бундан ташқари саҳна дизайни ҳам ўзига хос ясалган: ёрқин чироқлар, мусиқага ҳамоҳанг экран, томошабинларга яқин ўрнатилган саҳна — барчаси кайфиятни янада ошириш мақсадида қилинган. Шунингдек, қўшиқларга мос тарзда тайёрланган рақслар концертни чинакам шоуга айлантирди.
Концертда бир қатор санъаткор ва блогерлар ҳам меҳмон бўлди ва буни ўз Instagram саҳифаларига жойлади.
Концерт якунида томошабинлар фикри сўралганда улар бу сафар чинакамига бошқача шоу бўлганини таъкидлади.
Шоҳрух Instagramдаги шахсий саҳифасига видео жойлаб, қуйидагича изоҳ ёзди: “Концертга келган барча меҳмонларга катта раҳмат! Сизларнинг қўллаб-қувватлашингиз билан мана шундай ажойиб шоу бўлди!”
Репортажни тўлиқ ҳолда Дарё Lifestyle каналида томоша қилинг.
Изоҳ (0)