15 январь куни Тошкентдаги муҳташам “Халқлар дўстлиги” санъат саройида қорақалпоқ элининг фарзанди, “Дўстим, дўстим”, “Любимая” қўшиқлари билан танилган истеъдодли хонанда Осман Наврузовнинг иккинчи яккахон концерт дастури бўлиб ўтди. Ёрқин лаҳзаларга бой бўлган кечада хонанда ўзининг энг сара ва хит қўшиқлари билан барча мухлисларини “оёққа турғазди”. “Дарё” мухбири концертга бориб, хонанданинг ўзи, яқинлари билан суҳбатлашди ҳамда кечадан махсус репортаж тайёрлади.
Ёш хонандани қўллаб-қувватлаш учун Воҳиджон Исоқов, хоразмлик қўшиқчилар Севинч Исмоилова ва Гулинур ҳамда озарбайжонлик юлдуз Нефес ўз юртидан ташриф буюрди. Улар билан куйланган дуэтлар гулдастаси эса концертнинг яна файзли ўтишига сабаб бўлди. Севинч Исмоилова ҳамкасбини иккинчи концерти билан табриклаб, кеча файзли ўтишини тилади.
Концертда актриса Шаҳло Темирова бошловчилик масъулиятини ўз зиммасига олди. Қизиқчи Элмурод Ҳақназаров эса доимгидек ўз вазифасида — ҳар бир блок сўнгида, яъни хонанда танаффусга кирганда у томошабинларни зериктирмади.
“Ўзбекконцерт” томонидан Осман Наврузовга “Мазмунли ва ёрқин қўшиқлари учун” мукофот тақдим этилди. Аслида тақдирлаш маросими 2024 йилнинг 24 декабрида бўлиб ўтган бўлса-да, хонанда бу вақтда Туркманистонда гастрол сафарида эди. Шу боис ўз мукофотини олиш унга ўз концертида насиб этди. Бу эса, аввало, Османнинг ота-онаси, қолаверса, чин мухлислари ва ўзи учун ҳам икки карра хурсандчилик олиб келди.
— Барча санъаткорлар, устозлар орзу қиладиган санъат саройида концерт бериш менга ҳам насиб этяпти, бундан беҳад хурсандман. Бу сафарги концерт ўзгача бўлади, сабаби кутилган ва кутилмаган дуэтлар билан мухлисларимни хурсанд қиламан. Концерт фонограмма бўлишига қарамай, орада жонли ижрода ҳам қўшиқлар бўлади, дейди Осман Наврузов концерт бошланишидан аввал “Дарё” журналистига берган интервьюсида.
— “Дўстим-дўстим” қўшиғи менинг “Тўйлар муборак”им (таҳ. — “ташриф қоғози”) бўлиб қолган. Уни концертнинг бошида куйласам дастур тугаб қолади, униям, албатта, ижро этаман, фақат энг охирида, дейди хонанда.
Озарбайжонлик гўзал хонанда Нефес билан куйланган “Осиёда, Европада бир донасан, бир дона, ай, жоним, Нефес хоним олди менинг ақлима” қўшиғи концертнинг кулминацион нуқтаси бўлди. Мухлислар хорижлик хонанда билар бараварига куйлаб, уни тўхтовсиз олқишлар билан қўллаб-қувватлади.
Османнинг яқин дўсти Воҳиджон Исоқов шундай деди:
— Бугун меҳмон сифатида ташриф буюрдим, томошабинлар қаторида бўламан. Османнинг ижодига омад тилайман, менинг концертларимда ҳам Хоразмдан учиб етиб келган пайтлари бўлган, унга ҳурматим баланд. Бир-биримизни қўллаб қувватлаймиз, ёш санъаткорларнинг ичида ўз ўрнига эга, деди у.
Хонанда ўзининг ижодида қандай янгиликлар борлиги ҳақида ҳам сўзлаб ўтди:
— Бу йил ўзгаришлар катта бўлади, катта шижоат билан концертга тайёргарлик кўряпман, январь ойида Севинч Мўминова билан янги дуэт чиқади. Нега яна у билан куйлаётганимнинг сабаби бизнинг овоз темпимиз бир-биримизга мос тушади. Менинг ҳам, Севинчнинг оиласидагилар ҳам сизнинг овозингиз жуда мос, фақат бирга куйланглар дейишади (кулиб), деди Воҳиджон Исоқов.
Концерт Осман Наврузовнинг тўйи бўлди десак ҳам муболаға бўлмайди, буни хонанданинг ўзи ҳам тасдиқлади. “Она, ўйнанг, рақсга тушинг. Бугун менинг тўйим” дея волидасини саҳнага таклиф қилиб, “Бугун тўйим, ўйнанг, она” номли қўшиғини ижро этди. Концертдаги деярли барча қўшиқлар рақсбоп бўлди, зал воҳа ва қорақалпоқ элининг одамлари билан тўлди.
Концертдан репортажни тўлиқ ҳолда Daryo Lifestyle YouTube каналида томоша қилишингиз мумкин.
Изоҳ (0)