“Фарзандсиз эканимни ҳадеб эслатавериш шарт эмас” — комик Индира Мифтаҳова дилини оғритадиган саволлар ҳақида (видео)

“Stand up” устаси, комик Индира Мифтаҳова Daryo Lifestyle YouTube каналига берган интервьюсида фарзандсизлиги ва билиб-билмай қалбига озор бераётган одамлар ҳақида гапирди.

— Онам вафот этганидан кейин кўпчилик “Агар фарзандинг бўлганида, овунардинг”, деб тасалли беришди. Аммо ота-она ва боланинг ўрни бошқа-бошқа. Оила қурганимизга беш йил бўлди, ишонаман, бир кун Аллоҳ албатта бизга ҳам фарзанд беради. Лекин кунига бу ҳақда эллик марта гапиришса, охири кўзга ёш оларкансиз. Бу ҳақида ўйлашаётгани учун раҳмат, аммо фарзандни Аллоҳ беради. Дуо қилинглар, аммо ҳа деб эслатавериш шарт эмас. Олдин бу ҳақда ўйламасдим, муҳими турмуш ўртоғим вазиятни тушуняпти, умидимиз бор дердим. Аммо баъзи одамлар бахтли эканини исботлаш учун мени шу нуқтамга уряпти. Бу худди одамнинг камчилигини юзига айтишдек гап. Ҳатто душманимнинг ҳам дилини оғритишни истамайман. Баъзан ўзимни тутолмай йиғлаганимда шу даражада бешафқатмисизлар, дегим келади. Менга ҳам оғир, аммо на илож.

Баъзи мухлислар чин дилдан дуо қилиб “Сизга фарзанд тилайман”, дейишади. Уларнинг кўрсатаётган меҳридан қувонаман, аммо уни ҳам пинҳона сўрашларини истайман. Чунки энди унутдим, чалғидим деганимда яна кимдир эслаца, ҳаммаси қайталангандек бўлади.

Яқинда турмуш ўртоғим билан бир тадбирга бордик, у ерда 100 га яқин шоу-бизнес вакиллари бор эди. Ишонасизми, тадбир якунлангунига қадар асосий мавзу биз бўлдик. Бу жуда ёқимсиз ҳолат, қанчалик кулиб туришга ҳаракат қилмай барибир юрагим оғриди. Ота-онам ҳамма нарсадан бахтли бўлишни ўргатган. Фарзандим йўқ тўғри, аммо бахтли бўлишимнинг бошқа сабаблари кўп, дейди Индира Мифтаҳова.

Индира Мифтаҳова вайнлардан топган даромади сабаб қайнонасига уй совға қилгани ростми?

— Аслида уйни мен эмас, турмуш ўртоғим олди. Реклама асосида уй беришди, турмуш ўртоғим ёнидаги яна бир уйга тўлов қилди. Аввал ҳам рекламага уй бериш бўйича жуда кўп таклифлар бўлган. Доим рад этардим, боиси бунинг масъулияти жуда катта. Мен реклама қилсаму, аммо у вақтида топширилмаса ёки бошқа муаммолари юзага чиқса, ўзимни айбдор ҳис қиламан, дейди Индира Мифтаҳова.

Комик актриса бир муддат хорижда яшагани ва деярли ижтимоий тармоқларда ҳам кўриниши бермагани ҳақида гапирди

— Турмуш ўртоғим саккиз йил Жанубий Кореяда яшаган. Тўйдан аввал “Мен ҳам ўша ерда яшагим келяпти”, деганимда, албатта, бир кун олиб боришга ваъда берганди. Орадан беш йил ўтиб, орзуларимиз амалга ошди. Турмуш ўртоғимнинг ўқишга қабул қилиниши сабаб биз у ерда яшашимизга тўғри келди. Олти ой мусофирчиликда яшаб, жуда кўп нарсаларни ўргандим. Ватаннинг, яқинларнинг, ҳамюртларимизнинг қадрига етдим. Ижодкор бир лойиҳада иккинчисига ўтаётганда албатта, бир оз тин олиши керак. Шу боис анча камнамо бўлиб қолдим. Шунчаки одамларни кузатиб, руҳан дам олдим, дейди Индира Мифтаҳова.

Суҳбатни қуйидаги ҳавола орқали тўлиқ томоша қилишингиз мумкин.