Ўзбекистон ва Қорақалпоғистон халқ артисти Ғуломжон Ёқубов 1 март куни 75 ёшни қаршилайди. У қўшиқчи набираси, 25 йилдан буён концерт бериши, қўшиқ талашиш онгсиз одамларнинг иши экани ва уни ўлди дея ёлғон хабар тарқатганлар ҳақида “Дарё”га интервью берди.
Ғуломжон Ёқубов 50 йилдан ортиқ вақтдан буён санъатда. У 25 йилдан буён доим 1-2 март кунлари концерт бериб, туғилган кунини мухлислари даврасида нишонлайди.
— Туғилган кунимда менга кўпчилик билан у ер бу ерда ўтириб базм қилиш маъқул эмас, уни ўрнига саҳнада куйласам, халқ мени эшица, дардларимни тўкиб сочсам, дейман. Кимдир ресторанни маъқул кўрар, лекин менга мухлислар билан бўлиш ёқади. Энди бу йил таваллуд куним Рамазон ойининг илк кунига тўғри келаётгани сабабли, бу ойнинг ҳурматидан концертни бир кун аввалга кўчирдик, эртасига эса яқинлар билан ифторлик қиламиз, дейди устоз хонанда.
Ғуломжон Ёқубов фарзандлари санъаткор бўлишига тиш-тирноғи билан қарши бўлган. Аммо набираларга бу соҳага киришга рухсат берди. Унинг ўғил набираси бир неча концертларда қўшиқ куйлаб чиқаётган бўлса-да, бу йигит санъаткорнинг набираси эканлиги ҳақида оммага айтилмади.
— Қўшиқчи набирам ҳақида ҳеч қаерда гапирмаслигимнинг сабаби кўз тегмасин дейман. У ҳали гўдак, овози ўзгариши бор. Ёшлигидан танилган қанчадан қанча машҳур хонандалар бор, овози билан дунёни ҳайратга солган. Аммо бир оздан сўнг овози ўзгариб кетган. Ҳали ёш боланинг овози раста бўлади, шу жараёндан ўтиб олгани — ҳисоб. Бу йилги концертда чиқиш қилмайди, овози ўзгаряпти. Бундай вақтда овозни асраб туриш керак, дейди Ғуломжон Ёқубов.
Халқ артисти ўзининг қўшиқларини бошқа хонандалар куйлашига қандай қарайди?
— Ёрқинхўжага рухсат бердим, “Дилором”ни куйлади. Cоверъда ҳам ўзим ўтиргандим, менга ёқди, бўлди, куйлайвер, дедим. Қаерга борсак ҳам биргаликда айтиб беринглар, дейишади. У қандай айтган бўлса, мен ҳам унга қўшилиб cовер қилиб айтиб бераман. Бунга ҳеч қаршилигим йўқ, фақат қўшиқни бузиб ташламаса бас. Ҳеч ким куйламасин, дейиш нотўғри, деди санъаткор.
Ҳозир авж олаётган қўшиқ талашиш, устоз санъаткорларнинг қўшиғи куйланса, тақиқ қўйиш кабиларга Ғуломжон Ёқубов нима дейди?
— Санъат — халқники. Халқнинг ичидан чиқдими, унга бериш керак. Қўшиқ қайта куйланса, кўпроқ яшайди, ҳеч ким айтмагандан кейин бора-бора йўқ бўлиб кетади. Бу қўшиқни сен куйлама дейиш онгсиз одамларнинг фикри, онгсиз одамларнинг даъвати. Ўша гапни гапирганлар — энг онгсиз одамлар! Уларни фақат онгсиз деб ўйлайман. Улар фаҳм-фаросати йўқ одамлар! Бемалол айтавериш керак, фақат қўшиқ бузилмаса бўлгани. Мен ҳаммага қўшиқларимни айтишга рухсат бераман, маъқул келган бўлса, бемалол, деди халқ артисти.
Одамларнинг санъатга муносабати бугун қанчалик ўзгарган? Бугунги шоу-бизнеснинг аҳволи ҳақида санъаткор қуйидагича фикрда:
— Бизга мақом мактаб пайтидан ўргатилган. Ҳозиргилар шов-шувни орқасидан эргашади. Бу ўзбек санъати эмас, шоу-бизнес, пул топиш йўли. Қўшиқда ўзбек оҳанги, ноласи ва дарди, авжи бўлиши керак. Бугунги қўшиқларда дард йўқ, нола йўқ. Битта гапни қайтаверади, “ура-ура” қилиб бир нарсани айлантираверади. Ўтиргандаям, ётгандаям шу қўшиқ, клипи ҳам айланаверади. Ёш боланинг қулоғи хоҳласа, хоҳламаса шуни эшитади. Менга неча марта ҳакам бўлинг дейишади. Бормайман, чунки ундайларни эшитиб ғашим келади. Қайси бирини мақтай оламан кейин? Овози мустаҳкам йигит-қизлар бор, ўшаларни қўллаб-қувватлаш керак. “Шалдир-валдир”лар нимага керак? Мен 20-30 йилдан бери қараб юрибман — беш йил чиқади йўқ бўлади, уч йил чиқади йўқ бўлади. Лов этиб ёниб, пуф этиб ўчади. Ўзбекнинг санъати тамоман бошқача! Баъзи қўшиқларга қулоқни ёпиб олиш керак, умуман эшитиб бўлмайди. Лекин айнан шуларга ўртага тушиб олиб ўйнашади, ёшларни бузяпти булар. Тўй деб фақат бир хил нарса қилиш керакмас, дейди халқ артисти.
Бир неча ой илгари Ғуломжон Ёқубов ҳақида тарқалган ёлғон нохуш хабар кўпчилик сингари санъаткорнинг ўзига ҳам қаттиқ ботди...
— Ҳаётда ҳар хил одам бор, ажрата олмайсиз. Тирик одамни ўлди дейиш нимага тўғри келади? Мен бировни бекордан бекорга ўлди деб гап тарқацам, менга Худо кўрсатади. Бу бир мисол. Аввал текшириш керак, рост бўлса кейин айтиш керак. Орқадан валдир-вулдир гап нега керак? Бу нохуш хабар қалбимга оғир ботди. Тушунса тушунмаса, яна шундай хабар тарқатишяпти. Яхши отга бир қамчи, ёмон отга минг қамчи. Уларга гапиришнинг фойдаси йўқ экан, инсоф берсин. Мени “ўлди”га чиқаришса ҳам, ижодимни қилиб келяпман. Шундай деганларга ҳам умр тилайман. Ижодимни тўхтатмоқчимасман, умримнинг сўнггигача халққа хизмат қиламан, дейди Ғуломжон Ёқубов.
Санъаткор ҳақида гап кетар экан, унинг гардеробига алоҳида мавзуга айланади. Ғуломжон Ёқубов костюмлари ҳақида барчага қизиқ саволларга жавоб берди:
— Мен чет элга борсам, фақат дўкон қидираман. Ўзимиздаги дўконларга кирмаслигим мумкин, лекин четдан, албатта, ўзимга мос нарса топиб чиқаман. Бир йилда 3-4марта бораман, Яқинда ҳам гардеробимни кўрсатишимни сўрашди. Йўқ, кўрсатмайман, нима қиламан кўрсатиб? Одамлар уйи билан, машинаси билан мақтанади, менга ёқмайди бундай қилиш, шунинг учун гардеробимни ҳам кўрсатмайман. Кийганимда кўришсин, ёқса, қабул қилишсин. Шунинг ўзи етади. Энг қиммат костюмим нархини ҳам айтмайман. Қурби етадиган одам бор, етмайдигани бор. Бировнинг ғашига тегиб нима фойда топаман? 30-40 йил аввал кийганларим ҳам турибди, мендан кейин музей қилишади (кулиб), дейди ижодкор.
Суҳбатни Дарё Lifestyle YouTube саҳифасида тўлиқ томоша қилинг.
Изоҳ (0)