Бир йилда икки марта концерт берадиган “Беном” гуруҳи ноябрь ойидаги концертига старт берди. Хонандалар Сарвар ва Комил жонли ижрода энг ҳит тароналарини куйлаб, залга йиғилган тўрт мингдан зиёд мухлисларининг қувончига сабаб бўлди. “Дарё” жамоаси жонли ижродаги концерт дастурида иштирок этиб, ҳақиқий атмосферани ҳис қилишга имкон яратадиган репортаж тайёрлади.
“Дардим тингла, осмон” номли кино-концерт одатдагидек қисқа метражли фильм билан бошланди, кўплаб клипларда қатнашаётган актриса Кристина Рустамова бош қаҳрамон ролида гавдаланди.
“Концерт кутганимдан-да яхши ўтди, сабаби фильмни суратга олиш ишлари билан банд бўлиб тайёргарлик жараёнларида деярли қатнашолмагандик. Шахсий ҳаётимизда ҳам бир оз қийинчилик бўлди, концерт қандай ўтаркан, хатолар бўлса керак, деётгандим. Йўқ, ҳаммаси зўр ўтди. Куз ойида кино-концерт, май ойида одатий концерт беришимизга барча ўрганган. Кўпчилик мухлисларнинг кино-концертдаги фильмда нега ўзингиз рол ўйнамайсиз, ахир биз сизларни кўриш учун келамиз, деган таклифини инобатга олиб бу сафар ўзимиз рол ижро этишга қарор қилдик. Фильмда мен салбий қаҳрамон ролида чиқиб, сўнгида яхши тарафга ўзгарганман”, дейди Сарвар.
Кино-концерт ғояси илк бор “Беном” гуруҳидан чиққан ва ундан сўнг кўплаб санъаткорлар ҳам шу форматдаги концертни тақдим этди. Ғоя эскирмадими, янгилик қилиш ниятингиз йўқми, деган саволга Сарвар шундай жавоб берди:
Янгилик қилиш ниятимиз бор, албатта, февраль ойида “Ҳумо арена”да концерт қўйиш борасида музокараларни олиб бормоқдамиз. Тўрт кунлик концертимизнинг чипталари бир ой олдиндан сотилиб бўлганди, яна икки кун қўшмоқчи эдик, аммо “Халқлар дўстлиги”даги кунлар тақчиллиги сабаб бунинг имкони бўлмади.
Кундузги сеанс қўшиш режаси ҳам бўлди-ю, аммо созандалар жонли чалгани, ўзимиз ҳам жонли куйлаганимиз сабабли икки сеансда овоз пайчалари қийналиб қолиши мумкин эди. Фонограмма бўлганда, бемалол бир кунда икки сеансда концерт бераверган бўлардик.
Концерт сўнгида йигитлар мухлислари сўраган тароналарни ижро этиб берди. “Беном”нинг мухлислари ҳақиқатан бошқача — буни хонандаларга турли совғалар, ширинликлар, Сарвар ва Комилнинг суратидан ясалган гуллар совға қилинганидан ҳам билиш қийин эмас.
Концертингиз бир йилда икки марта, балки устоз санъаткорлар каби йилда бир марта 10-12 кунлаб концерт бериш вақти келгандир, деган таклифга Сарвар шундай жавоб берди:
Жонли ижрода узоқ вақт концерт бериш бир оз қийинроқ, биз фонограмма айтмаймиз, фонограмма айтсак мухлислар концертга тушишмайди, улар бизнинг жонли ижромизга ўрганган.
Юқори энергия билан ўтган концертда мухлислар “Беном” билан бараварига барча қўшиқларни куйлади, “Халқлар дўстлиги”да ҳақиқий шоу бўлиб ўтди.
Концертнинг тўлиқ репортажини “Дарё” Lifestyle YouTube каналида томоша қилинг.
Изоҳ (0)