“Бир фарзандим билан ёлғиз қолганимда ота-онам қўллаб-қувватлади” — Шаҳноза Ҳожимуродова руҳий тушкунлиги ва Зулфияхоним роли ҳақида (видео)

“Муҳаббат баҳори” фильмидаги Зулфияхоним роли билан томошабинларга яхши таниш бўлган актриса Шаҳноза Ҳожимуродова YouTube’даги Daryo Lifestyle каналига берган интервьюсида ҳаёт синовлари уни актриса бўлишга ундагани ҳақида гапирди.

— Ҳаётимда бир-иккита кўнгилсизликлар бўлиб, руҳий тушкунликка тушиб қолгандим. Қўлимда битта фарзандим билан ота-онамнинг уйида яшаётганимда онам “Сен ўқишинг ва ҳаётда ўз ўрнингни топишинг керак”, деб кўп айтарди. 2013 йилда Озодбек Назарбековнинг “Сарсон” номли қўшиғи ва унга ишланган клип машҳурликка эришганди. Райҳон Уласенованинг ижросига ҳавасим келиб, “Онажон, қанийди мен ҳам шундай роллар ижро этсам” деган эдим. Ота-онам ҳар бир қароримни қўллаб-қувватлашгач, энг қийин вазиятимда ҳеч қачон ёлғизлатишмаган. Бунинг учун улардан ҳамиша миннатдорман. Дадамнинг ўзи мени Тошкентга етаклаб келган, ижара уйда яшаб, институтда тайёрланганман. Шартнома асосида ўқишга кирсам, нима қиламан, ота-онамга оғирлигим тушадими, деб иккиланганман. Тўғри, ўзига тўқ оиланинг фарзандиман, аммо қиз бола турмушга чиққанидан кейин барибир яқинларидан истиҳола қиларкан. Омадим келиб, грант асосида ўқишга қабул қилиндим. Ўғлим онам билан бирга қолди, мен ҳали оила қурмаган, ҳеч қандай ташвиши йўқ қизлардек эмин-эркин ўқиганман. Ҳамма нарсани биламан деб мақтанмайман, аммо устозларим ҳаракат учун ҳам беш баҳо қўйиб беришарди, дейди актриса Шаҳноза Ҳожимуродова.

Шаҳноза Ҳожимуродова аввалига театрга қабул қилишмагани ва муносиб актриса эканлигини қандай исботлагани ҳақида гапирди.

— Устозларимиз ўқиш вақти сёмкаларга боришимизга рухсат беришмасди. Аввал пойдеворни мустаҳкам қилиш кераклигини айтишарди. Ўқишни тамомлаб, Ўзбек Миллий академик драма театрига бордик. Аммо раҳматли Фатҳулла Масъудов штат ўрни йўқлигини айтди. Ҳафсалам пир бўлиб “Энди Хоразмга қайтиб кетаманми?” деб ўйладим. Чунки бу театрда ишлашимни нафақат мен, балки онам ҳам истарди. Уч марта рад жавобини олгач, умидим ҳам сўниб қолганди. Ўша пайтларда “Маданият ва маърифат” каналида “Образ шоу” деган кўрсатув бўларди. Кўрсатувнинг янги сонида “Зайнаб монологи” ижро этилишини айтиб, ролга таклиф этишди. Иштирокчиларнинг ҳаммаси профессионал, театрнинг тажрибали актрисалари эди. Уларнинг орасида ёлғиз мен институтни энди тугатган эдим. Хуллас, иштирок этдим, раҳматли Шуҳрат Қаюмов, актриса Лола Элтоева чиқишимни юқори баҳолашди. Ана шу кўрсатувдаги иштироким Ўзбек Миллий академик драма театрига ишга қабул қилинишимга сабабчи бўлди. Чунки уни Фатҳулла Масъудов ҳам томоша қилган экан. Аммо бу ҳали штатга қабул қилиндим, дегани эмасди. 4 йил давомида гонорар асосида ишлаб, таниқли режиссёр Баҳодир Йўлдошевнинг чиғириқларидан ўтиб, кейин штатга қабул қилиндим, дейди Шаҳноза Ҳожимуродова.

Актриса Зулфияхоним ролига тасодифан тасдиқлангани ва ўшанда камера қаршисида туришни ўргангани ҳақида гапирди.

— Актриса бўлиш учун заринг ёки зўринг бўлиши керак, дейишади. Баъзи актрисалар эса интервьюларида режиссёрлар номаъқул таклифни беришгани, у рад этгани учун ролга тасдиқлашмагани ҳақида айтишади. 2019 йилдан буён ижод қилаётган бўлсам, на кино, на театрда бундай ҳолатга гувоҳ бўлдим. Меҳнаткаш, иқтидорли ва табиий юзли актриса ҳамиша керак. Агар ўша рол актрисаники бўлса, ҳеч ким уни чеклолмайди. “Муҳаббат баҳори” фильмига кастинг бўлаётганини дугонамдан эшитганман. Ҳамма қатори фотокастинг топширганман, ҳаммага бир хил монолог берилган. Ундан кейин видеокастингга чақиришган. Мендан аввал энг маҳоратли, таниқли актрисалар кастинг топширишганди. Улар шошиб тургани учун “Ҳамма топшираверсин, менинг вақтим бемалол”, дегандим. Видеокастинг Зулфияхоним ва Ҳамид Олимжон яшаган уйда бўлиб ўтганди. Бир чеккада хаёлан Зулфияхоним билан гаплашиб турсам, келинлари мени кўриб “Шу қизда аяжонимни кўргандек бўлдим”, деган экан. Зулфияхоним роли ижодимдаги илк ва бош рол бўлган. У сабаб камера қаршисида туришни ўрганганман, дейди актриса.

Видеони тўлиқ ҳолда томоша қилинг.