Томошабинлар ижобий қаҳрамонларни сўзсиз яхши кўришади. Бироқ актёр ёвуз қаҳрамон ролида шунчалик ишончли ўйнаб, томошабинни қўрқита олса, бу ҳақиқий профессионаллик ҳисобланади. Айниқса, экрандан ташқарида жуда ёқимли ва меҳрибон одам антагонист ролини ўйнаса, бу жуда таъсирли бўлади.
1. Люциус Малфой — Жейсон Айзекс
Актёр ёвуз қаҳрамонларни, айниқса, Люциус Малфойни ажойиб тарзда ижро этган. У ва экрандаги оиласи ҳақида сўз юритганда Жейсон Айзекс “Гарри Поттер”да Том Фелтон гавдалантирган “ўғли” Драко эканлигини эътироф этган. Гарри зулматга қарши курашнинг табиий рамзи бўлса, золим ота тарбиялаган Драконинг танлов имконияти бор эди. Кўпинча айнан Драко олийжаноб ишларни амалга оширарди.
Ҳамкасблари таъкидлашича, Жейсон кундалик ҳаётда ғоят меҳрибон ва мулойим инсон, аммо суратга олиш майдонида бир лаҳзада ижобий қаҳрамондан салбийга ўта олади. Айзексни бу қобилиятлари учун доктор Жекил ва жаноб Ҳайдга ўхшатишлари бежиз эмас.
2. Жоффри — Жек Глисон
19 ёшида “Тахтлар ўйини” сериалида суратга тушган Жек Глисон ҳокимиятга эришган шафқатсиз ҳукмдор Жоффри ролини ижро этди. Йигит персонаж характерини шунчалик ишонарли тарзда гавдалантириб бергандики, ёш қирол ҳанузгача кино тарихидаги энг нафратга сазовор салбий қаҳрамонлардан бири саналади.
Хайрия ишлари билан шуғулланувчи хушфеъл йигит экрандаги образининг бутунлай акси.
2014 йилда Жек кинодан кетишини эълон қилганда, кўпчилик бунинг сабаби таъқиб деб ўйлади. Аммо ёш актёр шунчаки касбидан совиган ва осойишта ҳаёт кечиришни истаганди. Шунга қарамай, у 2023 йилда “Тинч гаван” сериалида рол ўйнаб, экранларга қайтди.
3. Милдред Ретчед — Луиза Флетчер
“Какку уяси узра парвоз” номли машҳур драма чиққанидан сўнг, ҳамшира Милдред Ретчеддан бутун дунё нафратланадиган бўлди. Шафқатсиз аёл образи Луиза Флетчернинг биринчи катта роли бўлди. Кейинчалик Америка кино институти Ратchednи энг буюк кино ёвузлари рўйхатига киритди.
“Стар Трек: узоқ коинот 9” сериалидаги Луизанинг диний тариқат етакчиси Кай Винн ролини ижро этиши Флетчернинг шафқатсиз образини янада мустаҳкамлади.
Флетчерни шахсан таниганлар эса уни нозик табиатли, хушмуомала ва ғамхўр инсон сифатида хотирлашади. Айтганча, “Какку уяси узра парвоз” фильми учун “Оскар” мукофотини қабул қилаётганда Луиза кар-соқов ота-онасига миннатдорлик билдириб, томошабинларни йиғлатади — ўшанда актриса имо-ишора тилида сўзлаган.
4. Саруман — Кристофер Ли
Кристофер Лининг севимли китоби “Узуклар ҳукмдори” экани бежиз эмас. Актёр Ж.Р.Р. Толкинни шахсан таниган ва кейинчалик, гарчи ўзи маънан Ёруғлик қаҳрамонларига яқинроқ бўлса-да, Саруман ролини алоҳида эҳтиром билан ижро этган. Унинг ижодий фаолиятида граф Дракула, жаллод Сансон, Франкенштейн махлуқи каби роллар бор. Салобатли аристократ доимо қора образларга моҳирона киришган, бироқ саҳнадан ташқарида у ўта маданиятли инсон бўлиб қолаверган.
Кристофер Ли билан учрашиш бахтига муяссар бўлган мухлислар устоз мулоқотда нақадар содда ва самимий бўлганини эслайди: у бир соат давомида мухлис билан суҳбатлашишга вақт ажрата олар ва буни ҳеч қандай кибр ёки манманликсиз амалга ошира оларди.
5. Долорес Амбриж — Имелда Стонтон
Сеҳргарлик вазирининг ўринбосари ва шуҳратпараст Долорес Амбриж ролини Имелда Стонтон ижро этиши маълум бўлгач, бу жозибали аёл ижодининг мухлислари танловнинг тўғрилигига шубҳа қилади. Аммо “Гарри Поттер ва Қақнус ордени” фильмида Имелданинг овозини эшитиб, унинг сунъий табассум-ла жилмайишини кўрган заҳотиёқ ҳаммаси ўз ўрнига тушди.
Аслида Стонтон самимий ва очиқкўнгил аёл. Гарчи болалар ҳали ҳам кўчаларда унинг олдига келиб, нима учун Гаррини шунчалик ёмон кўрганини сўрасалар-да, бу актрисанинг маҳорати ҳисобланади.
Изоҳ (0)