Хитойнинг энг бой актрисалари топ-7 талиги: Дилраба Дилмурат эса охирги ўринда

Аввалги мақолаларимизда Американинг энг бой актёр ва актрисалари тўғрисида, сал олдин эса Хитойнинг энг бой актёрлари ҳақида маълумот бергандик. Қуйида Хитойнинг энг бой ва гўзал актрисалари билан танишинг.

7. Дилраба Дилмурат

“Абадий севги” сериали асли келиб чиқиши уйғурлардан бўлган Дилрабани романтик драмалар рамзига айлантирди.

Ҳозирда унинг бойлиги 15 миллион доллар атрофида.

У LʼOréal, P&G ва Mikimoto каби нуфузли брендлар билан ҳамкорлик қилади. Ҳатто ўзининг Jaywalk номли киностудияси ҳам бор. Актриса Хитой шоу-бизнесидаги энг ҳурматли шахслардан бири ҳисобланади.

6. Чжао Ли Ин

Актриса фаолиятини истеъдодлар танловида ғалаба қозонганидан сўнг нолдан бошлаган бўлса-да, кейинчалик “Шен Ли афсонаси”, “Гулнинг саёҳати”, “Чу Сиао афсонаси” каби лойиҳаларда шуҳрат қозонди.

Ҳозирги кунда унинг ҳисобида тахминан 20-30 миллион доллар мавжуд. Асосий даромад манбайи, шубҳасиз, сериаллардир. Бунга қўшимча равишда реклама ҳам — у билан йирик брендлар ҳамкорлик қилади, чунки унинг обрўси ва ишончлилиги жуда юқори даражада.

5. Сун Ли

Сун Ли Хитой тарихий сериалларининг ҳақиқий маликаси ҳисобланади — “Чжен Хуан афсонаси” ва “Ми Юе афсонаси” шулар жумласидан.

Унинг бойлиги тахминан 30 миллион долларни ташкил этади. Энг сара лойиҳаларни танлашни маъқул кўради, реклама бўйича ҳам фақат нуфузли брендлар билан ҳамкорлик қилади.

2010 йилда актёр Ден Чао билан турмуш қурган, ҳозирда икки фарзанди бор. Уларни “Хитой шоу-бизнесининг намунали жуфтлиги” деб ҳам аташади.

4. Ян Ми

У 4 ёшида кинога суратга туша бошлаган, 6 ёшида биринчи мукофотни қўлга киритган ва 2011 йилда “Сарой” телесериалидан кейин шуҳрат чўққисига эришган.

Актрисанинг бойлиги 30-40 миллион долларга баҳоланмоқда. Кинога тушиш, реклама, суҳбатлар, журнал муқовалари — барчаси изчил равишда давом этмоқда. Аммо энг муҳими, Ян Ми Jaywalk Studio’да ҳамтасисчи. Шунингдек, атирдан тортиб смартфонларгача бўлган барча нарсаларни реклама қилади, хайрия ишларида ҳам фаол иштирок этади.

3. Фан Бинбин

90 йилларнинг охирида актриса дебютини “Марварид маликаси” сериали билан бошлаб, “Хитой маликаси”, “Х-одамлар” ва яна бир қанча лойиҳаларда иштирок этди.

2018 йилгача у Голливуд юлдузлари каби даромад топарди: йилига 43 миллион доллар, ҳашаматли брендлар билан шартномалар, шахсий студияси, бизнеси, журнал муқовалари — барчаси бор эди. У Осиёнинг энг юқори маош олувчи актрисаси ҳисобланарди.

Сўнгра солиқ можароси юз берди. Маълум бўлишича, унинг икки томонлама шартномалари бор экан ва давлат унга 129 миллион долларлик жарима белгилади. Уни шунчаки оммавий ахборот воситаларидан ўчириб ташлашди, карьерасини тўхтатиб қўйишди, барча платформалардан олиб ташлашди — гўё у ғойиб бўлгандек.

Бироқ Бинбин таслим бўладиганлардан эмасди. Аста-секин халқаро лойиҳалар орқали қайтиб келди: “Код 355”, кейин “Яшил тун” фильмида суратга тушди, Берлин кинофестивалида пайдо бўлди. Бундан ташқари, у ўзининг Fan Beauty брендини ишга туширди.

Можародан олдин унинг бойлиги 100 миллион долларга баҳоланган эди. Аммо ҳозирги ҳолати ҳақида маълумот йўқ.

2. Чжан Цзи

“Яширинган йўлбарс” ва “Қаҳрамон” фильмларидан сўнг актриса Голливуднинг қизил гиламларига таклиф этила бошланди, “Гейша хотиралари” эса уни Осиёдан ташқарида Хитой киносининг тимсоли даражасига кўтарди.

Унинг бойлиги, тахминан 100 миллион доллар атрофида. Бу маблағ халқаро фильмлар, йирик брендлар рекламалари ва нуфузли лойиҳалардан келиб тушади.

Шу билан бирга, у хайрия ишлари билан шуғулланади ва йирик халқаро ташаббусларда фаол иштирок этади.

1. Чжао Вей

90 йилларнинг охирида “Marvarid маликаси” драмасидаги роли билан мамлакатни ларзага келтирди — шундан бери у “халқнинг севимли актрисаси” мақомида. Кейинчалик “Мулан”, “Қизил қоя жанги” каби фильмларда суратга тушди, 2013 йилда эса ўзи “Ёшлар” фильмини суратга олди ва мукофотларга сазовор бўлди. Чжао Вей актёрлик, режиссёрлик ва раҳбарлик қилишни моҳирона уддалайди.

Унинг бойлиги тахминан 1 миллиард долларга етади. Бунинг барчаси Alibaba Picturesъга қилган инвестициялари туфайли. Бундан ташқари, у брендларни бошқарган, компаниялар ва банклар акцияларига эгалик қилган. Ҳатто Францияда шахсий шароб ишлаб чиқариш корхонаси ҳам бўлган.

Аммо ҳозир у оммавий ахборот воситаларидан ғойиб бўлди, платформалардан ўчирилди, фильмлари олиб ташланди. Расмий сабаблар айтилмаган, аммо Хитойда бундай воқеалар бежиз юз бермайди. Сиёсий можаро ҳақида миш-мишлар тарқалган, аниқ маълумотлар берилмаган.