Мадриднинг “Реал” клуби футболчиси Родриго Гоэс фаолиятини “Манчестер Сити”да давом эттиришга яқин турибди. Бу ҳақда журналист Николо Скира ўзининг ижтимоий тармоқдаги саҳифасида хабар берди.
Манбага кўра, томонлар ўртасида дастлабки музокаралар бўлиб ўтган. “Шаҳарликлар” 24 ёшли бразилиялик ҳужумчи билан 2030 йилга қадар амал қиладиган 5 йиллик шартнома имзолашга тайёр. “Реал” эса Родриго трансферидан тахминан 100 миллион евро ишлаб олишни режалаштирмоқда.
Айни пайтда “Манчестер Сити”нинг бир нечта футболчиларнинг трансфер ойнаси якунига қадар жамоани тарк этиши кутилмоқда. Хусусан, Савинё “Тоттенҳэм”га, Жек Грилиш эса “Эвертон”га ўтиши мумкин. Шу боис бош мураббий Пеп Гвардиола қанот ҳужумини кучайтиришни мақсад қилган. Родриго эса бу позиция учун асосий номзодлардан бири сифатида кўрилмоқда.
Футболчининг ўзи ҳам “Реал”ни тарк этишга қарши эмас. Сабаби у 2026 йилги Жаҳон чемпионатига оптимал спорт формасини боришни истамоқда. “Қироллик клуби”да эса унга етарли ўйин амалиёти берилмаяпти. Шу сабабли Родриго бошқа жамоага ўтиш имкониятини кўриб чиқмоқда.
- Маълумот ўрнида, Родриго 2019 йил ёзидан бери “Реал Мадрид” сафида тўп суради. Унинг клуб билан тузган амалдаги шартномаси 2028 йил ёзигача давом этади.
- Эслатиб ўтамиз, Испания Ла Лигаси 15 август куни старт олди. “Реал Мадрид” чемпионат доирасидаги илк ўйинини 19 август оқшомида “Осасуна”га қарши ўтказади.
Изоҳ (0)