Голливудда суратга тушган кореялик актёрлар

Жанубий кореялик баъзи актёрлар нафақат Осиёда, балки Голливудда ҳам мухлислар орттиришга улгурган.

Ли Бён Хон

У “G.I. Joe: кобра зарбаси” ва “G.I. Joe: қасос”, шунингдек, “RED 2” фильмларидаги роллари билан машҳур. Голливуднинг Ченнинг Татум, Жозеф Гордон-Левитт, Дуэйн Жонсон, Брюс Уиллис, Жон Малкович каби юлдузлари билан бирга суратга тушган.

Бундан ташқари, Арнольд Шварценеггер ва Эмилия Кларк билан биргаликда “Терминатор: генезис” фильмида асосий салбий қаҳрамон ролини ижро этган.

Ма Дон Сок

Дон Сок “Умрбоқийлар” фильмида Гилгамиш ролини ижро этган. Бу Marvel комиксларига асосланган Америка суперқаҳрамонлар фильми бўлиб, Marvel кинематографик оламининг 26-фильми ҳисобланади. Дон Сок Салма Ҳаек ва Анжелина Жоли каби машҳур Голливуд юлдузлари билан рол ўйнаган.

Ли Жун Ки

Жун Ки “Ёвузлик макони: сўнгги боб” фильмида Амбрелла қуролли кучларининг аъзоси бўлган қўмондон Чу ролини ижро этди.

Бу худди шу номдаги видео ўйинга асосланган машҳур фильмлар туркумининг олтинчи ва якуний қисмидир. Бош қаҳрамон Элис (Милла Ёвович) вирус тарқалиши бошланган Раккун Ситига қайтиб, Амбрелла корпорациясини бутунлай йўқ қилишга уринади. Фильм ўзида жанг, даҳшат ва илмий фантастика унсурларини мужассам этиб, Элиснинг зомби ҳамда мутантларга қарши кураши ҳақидаги ҳикоясини якунлайди.

Пак Со Жун

Ўтган йилнинг 10 ноябрида Пак Со Жун ўзга сайёралик шаҳзода Ян роли билан Голливудда дебют қилди. “Mарвеллар” фильмида Со Жуннинг экрандаги вақти атиги икки-уч дақиқани ташкил этди, бу эса унинг мухлисларининг ҳафсаласини пир қилди.

Унинг қаҳрамони — одамлар мусиқий тилда сўзлашадиган Аладна сайёрасини бошқарадиган шаҳзода Ян. Со Жун ўз роли устидаги ишини шундай шарҳлади: “Менимча, мен куйлайдиган қўшиқларни яратишдан олдин, улар қўшиқ айтишимда муаммо бўлмаслиги учун овоз диапазонимни текширганлар. Бу саҳналарни суратга олиш пайтида яхши қўшиқ айтишдан кўра қаҳрамоннинг ҳис-туйғуларини етказишга кўпроқ эътибор қаратишга интилдим”.

Пе Дуна

Бир нечта йирик Голливуд фильмларида рол олган корейс актрисаси. У “Булутли Атлас” фильмида Сонми-451 образини гавдалантирган. Сонми-451 2144 йилда Нео-Сеул деб номланган келажакдаги жамиятда яшовчи клондир. У кафеда ишлаб, аста-секин ўз жамиятининг шафқатсиз моҳиятини ва ўзининг ҳақиқий вазифасини англай бошлайди. Сонми қаршилик рамзига айланади ва зулмкор тузумга қарши инқилобни илҳомлантиради.