Netflix стриминг платформаси “Уэнздей” сериали иккинчи мавсуми учун илк тизер-трейлерини эълон қилди ва премера саналарини маълум қилди. Сериал давоми икки қисмга бўлинган: биринчи қисмнинг премераси 6 август, иккинчиси эса 3 сентябрь куни бўлиб ўтади.
Видеода бош қаҳрамон Уэнздей “Невермор” академиясига қайтаётгани тасвирланган. Унда Уэнздей кўтариб келган қуроли эмас, балки “Тҳинг” (қўл)нинг олиб киришга уринган қуёшдан ҳимояловчи крем эътиборни тортади.
“Бу биринчи марта ўз ихтиёринг билан мактабга қайтишинг”, дейди роликда Мортиша Аддамс.
“Бу жиноят содир этилган жойга қайтишдек гап. Мен жасадлар қаерда кўмилганини аллақачон биламан”, деб жавоб беради Уэнздей.
Адамс оиласининг ақлли ва совуққон вакили ҳақида ҳикоя қилувчи сериал иккинчи мавсумини суратга олиш ишлари 2024 йил баҳорида бошланган. Олдинроқ лойиҳа ижодкорлари янги мавсумда бош қаҳрамон ва унинг онаси Мортиша Аддамс ўртасидаги муносабатларга кўпроқ эътибор қаратилишини айтишганди. Женна Ортега эса янги мавсумда кўпроқ жанговар саҳналар бўлишини маълум қилган.
Сериал муаллифи сифатида яна Тим Бёртон танланди. Унда Женна Ортега, Гвендолин Кристи, Луис Гусман, Кетрин Зета-Жонс, шунингдек, Леди Гага ва Стив Бушеми суратга тушган.
Маълумот учун, сериалнинг дастлабки саккиз қисми 2022 йилнинг 23 ноябрида Netflix платформаси юзини кўрган эди. Сериал премерасидан буён жами 752 миллион соат томоша қилинган. Бу ҳисоб сериал чиққанидан кейинги дастлабки 28 кунга асосланади.
Шунингдек, лойиҳа илк ҳафтанинг ўзидаёқ 341,2 миллион соат кўрилган. У 83 давлатда энг оммабоп сериалга айланган ва 93 мамлакатда энг кўп кўрилаётган сериалларнинг биринчи 10 талигига кирган.
Изоҳ (0)