Netflix платформасида намойиш этилган “Калмар ўйини” сериалининг машҳурлиги ва муваффақияти ортида актёрларнинг узлуксиз меҳнати, баъзида эса саломатлигига зарар етадиган даражадаги фидокорона меҳнати яширинган. Ушбу сериалда рол ижро этган бир қанча актёрлар суратга олиш ишлари тугаганидан сўнг турли руҳий муаммоларга дуч келган.
Қуйида “Калмар ўйини” актёрларининг ролга кириш жараёни қандай кечгани ва сериал туфайли уларнинг психологик ҳолати қанчалик ўзгаргани ҳақида тўхталамиз.
Ли Жонг Же
Сериал бош қаҳрамони Сон Ки Хун образини яратган Ли Жонг Же бугунги кунда Корея кино саноатининг энг машҳур юлдузларидан бирига айланган. Аммо актёр биринчи мавсум суратга олиш ишлари тугагач, чуқур руҳий тушкунликка тушиб қолган. У тун ярмида уйғониб, совуқ терга ботар, сериалдаги ўйинлар билан боғлиқ даҳшатли тушлар кўрган.
“Мен образга шу қадар киришиб кетдимки, суратга олиш ишлари тугаганидан сўнг ҳам узоқ вақт давомида ундан ажрала олмадим. Бўлиб ўтган воқеалар, оғриқли ҳодисалар, қонли кадрлар ва умидсизлик мени жуда эзиб юборган эди”, дейди актёр.
Унинг сўзларига кўра, ушбу мураккаб рол уни нафақат жисмонан, балки руҳий жиҳатдан ҳам толиқтирган.
Пак Хе Су
Сериалдаги яна бир ёдда қоладиган образ Чо Сан Ву бўлиб, уни актёр Пак Хе Су ижро этган. Унинг қаҳрамони ақлли, мулоҳазали, аммо ўз йўлини йўқотган, ғалаба учун ҳамма нарсани қурбон қилишга тайёр инсон. Актёр бу мураккаб характерни чуқур ўрганишга ҳаракат қилган, образнинг ички кураши ва зиддиятларини чуқур таҳлил қилган. 2022 йил январь ойида журналистларга берган интервьюсида:
“Образдан ўзимни ажратиб олиш жуда оғир бўлди. Суратга олиш ишлари тугаганидан кейин ҳам Чо Сан Ву ҳақидаги ўйлар мени тарк этмади. Мен унинг ҳаракатларини оқлашга, тушунишга ҳаракат қилдим. Бу ҳолат юрагимда босим бўлиб тураверди”, деди актёр.
Пак Хе Сун тушларида ҳам сериалдаги ўйинларни кўрганини, одамлар гавжум жойларда ўзини ноқулай ҳис қилганини айтиб, психологдан ёрдам сўрашга мажбур бўлган.
Чон Хо Ён
Сериал орқали катта машҳурликка эришган модел ва актриса Чон Хо Ён эса муваффақият ортидан келган босимни кўтара олмаган. У бир ҳафта ичида стресс туфайли 2,7 килограмм вазн йўқотган. Мухлислар унинг ҳолатидан жиддий хавотир олишган, бироқ актриса кейинчалик соғлиғини тиклашга муваффақ бўлган. Унинг таъкидлашича, тўсатдан келган машҳурлик уни овқатланиш ва ҳатто сув ичиш истагидан бутунлай маҳрум қилган.
Хо Сон Те
Сериалда жиноятчи ролини маҳорат билан ижро этган актёр Хо Сон Те эса машҳурлик ортидан оғир психологик босимга дуч келган. У ҳатто оддий одамлар билан мулоқот қилишдан ҳам қўрқиб қолган. Бу ҳолат унинг кейинги лойиҳаси — “Ёлғиз қирмизи юрак” сериалига салбий таъсир кўрсатган. Актёр ҳатто ўз образининг қизи билан суҳбатлашиши керак бўлган саҳнани бекор қилишни сўраган, чунки инсонлар билан гаплашиш уни қўрқитиб қўйган эди. Яхшиямки, режиссёр унинг ҳолатини тушуниб, Хо Сон Тега ёрдам берган ва аста-секин актёрнинг руҳий аҳволи тиклана бошлаган.
О Ён Су
Актёр О Ён Су сериалдаги ролидан сўнг халқаро миқёсда машҳурликка эришган. Аммо бу шон-шуҳрат уни ноаниқ бир ҳолатга солиб қўйган. Актёр суратга олиш ишлари тугаганидан сўнг, ички бўшлиқ ҳисси уни қамраб олганини айтган:
“Мен ўзимни гўё ҳавода муаллақ қолгандек ҳис қиляпман. Ўзимни тинчлантиришим, фикрларимни йиғишим ва ўнглаб олишим керак.”
Бироқ актёрнинг ҳаётий тажрибаси ва донолиги уни бу ҳолатдан тезда олиб чиққан. “Калмар ўйини” айни дамда унинг сўнгги лойиҳаси саналади. Ушбу роли учун у нуфузли “Олтин глобус” мукофотини қўлга киритган.
Изоҳ (0)